Sahidic Bible Citation1069
Shenoute, Canon 8 previous | next
Citation Text
… ϫⲉ ⲟⲩϩⲟⲓ̈ⲧⲉ ⲉϥϣⲁⲛϣⲱⲡⲉ ⲛ̄ϩⲏⲧϥ︦ ⲛ̄ϭⲓⲟⲩϩⲣ︦ⲃ︦ ⲛ̄ⲥⲱⲃϩ︦ ϩⲛ̄ ⲟⲩϩⲟⲓ̈ⲧⲉ ⲛ̄ⲣⲱⲧ·· ⲏ̄ ϩⲛ̄ ⲟⲩϩⲟⲓ̈ⲧⲉ ⲛ̄ⲥⲓⲡⲡⲓⲛ· ⲏ̄ ⲛ̄ⲗⲁⲥ· ⲏ̄ ϩⲛ̄ ⲟⲩϣⲧⲓⲧ· ⲏ̄ ϩⲛ̄ ⲟⲩⲃⲏⲕⲉ· ⲏ̄ ϩⲛ̄ ⲟⲩⲉⲓⲁⲁⲩ· ⲏ̄ ϩⲛ̄ ⲟⲩⲥⲟⲣⲧ̄· ⲏ̄ ϩⲛ̄ ⲟⲩϣⲁⲁⲣ· ⲏ̄ ϩⲛ̄ ϣⲁⲁⲣ ⲛⲓⲙ ⲉϣⲁⲩⲣ̄ϩⲱⲃ ⲛ̄ϩⲏⲧϥ︦· ⲁⲩⲱ ⲛ̄ⲧⲉⲡϩ︦ⲣ︦ⲃ︦ ϣⲱⲡⲉ ⲉϥⲟⲩⲉⲧⲟⲩⲱⲧ· ⲏ̄ ⲉϥⲙⲟⲣϣ︦ ϩⲙ̄ ⲡϩⲟⲓ̈ⲧⲉ· ⲏ̄ ϩⲙ̄ ⲡϣⲁⲁⲣ· ⲏ̄ ϩⲙ̄ ⲡⲉϣⲧⲓⲧ· ⲏ̄ ϩⲙ̄ ⲡⲃⲏⲕⲉ· ⲏ̄ ϩⲛ̄ ⲥⲕⲉⲟⲥ ⲛⲓⲙ ⲛ̄ϣⲁⲁⲣ ⲉϣⲁⲩⲣ̄ϩⲱⲃ ⲛ̄ϩⲏⲧϥ︦· ⲡⲉⲓ̈ϩⲣ︦ⲃ︦ ⲟⲩⲥⲱⲃϩ︦ ⲡⲉ· ⲉϥⲉⲧⲥⲁⲃⲟⲟⲩ ⲉⲡϩ︦ⲣ︦ⲃ︦· ⲛ̄ⲧⲉⲡϩⲓⲉⲣⲉⲩⲥ ϯϩⲧⲏϥ ⲉⲡϩ︦ⲣ︦ⲃ︦· ⲁⲩⲱ ⲡϩⲓⲉⲣⲉⲩⲥ ⲉϥⲉⲡⲱⲣϫ̄ ⲉⲃⲟⲗ ⲙ̄ⲡϩ︦ⲣ︦ⲃ︦ ⲉⲧⲙ̄ⲙⲁⲩ ⲛ̄ⲥⲁϣϥ︦ ⲛ̄ϩⲟⲟⲩ· ⲉⲣⲉⲡϩⲓⲉⲣⲉⲩⲥ ⲛⲁⲩ ⲉⲡϩ︦ⲣ︦ⲃ︦ ϩⲙ̄ ⲡⲙⲉϩⲥⲁϣϥ︦ ⲛ̄ϩⲟⲟⲩ· ⲉⲣϣⲁⲛⲡϩ︦ⲣ︦ⲃ︦ ⲇⲉ ⲉⲧⲙ̄ⲙⲁⲩ ⲡⲱⲣϣ︦ ⲉⲃⲟⲗ ϩⲙ̄ ⲡⲉⲣϣⲱⲛ· ⲏ̄ ϩⲙ̄ ⲡⲉϣⲧⲓⲧ· ⲏ̄ ϩⲙ̄ ⲡⲃⲏⲕⲉ· ⲏ̄ ϩⲙ̄ ⲡϣⲁⲁⲣ· ⲕⲁⲁⲉⲓⲟⲡⲉ ⲛⲓⲙ ⲉϣⲁⲩⲁⲁⲩ ϩⲛ̄ ⲛ̄ϣⲁⲁⲣ· ⲟⲩⲥⲱⲃϩ︦ ⲉϥⲙⲏⲛ ⲉⲃⲟⲗ ⲡⲉ ⲡϩ︦ⲣ︦ⲃ︦· ⲟⲩ ⲁⲕⲁⲑⲁⲣⲧⲟⲛ ⲡⲉ· ⲉϥⲉⲣⲱⲕϩ︦ ⲙ̄ⲡϩⲟⲓ̈ⲧⲉ ⲉⲧⲙ̄ⲙⲁⲩ· ⲏ̄ ⲡⲉϣⲧⲓⲧ· ⲏ̄ ⲡⲃⲏⲕⲉ· ⲏ̄ ⲡⲥⲟⲣⲧ̄· ⲏ̄ ⲡⲉⲓⲁⲁⲩ· · ⲏ̄ ⲥⲕⲉⲟⲥ ⲛⲓⲙ ⲛ̄ϣⲁⲁⲣ· ⲉⲣϣⲁⲛⲡϩ︦ⲣ︦ⲃ︦ ⲙ̄ⲡⲥⲱⲃϩ︦ ⲉⲧⲙⲏⲛ ⲉⲃⲟⲗ ϣⲱⲡⲉ ⲛ̄ϩⲏⲧⲟⲩ· ⲉⲩⲉⲣⲟⲕϩⲟⲩ ϩⲛ̄ ⲟⲩⲥⲁⲧⲉ· ⲉⲣϣⲁⲛⲡϩⲓⲉⲣⲉⲩⲥ ⲇⲉ ⲛⲁⲩ ⲛ̄ⲧⲉⲧⲙ̄ⲡϩ︦ⲣ︦ⲃ︦ ⲉⲧⲙ̄ⲙⲁⲩ ⲙⲟⲟϣⲉ ⲉⲡⲱⲣϫ̄ ⲉⲃⲟⲗ ϩⲙ̄ ⲡϩⲟⲓ̈ⲧⲉ ⲏ̄ ϩⲙ̄ ⲡⲉϣⲧⲓⲧ· ⲏ̄ ϩⲙ̄ ⲡⲃⲏⲕⲉ ⲏ̄ ϩⲛ̄ ⲥⲕⲉⲟⲥ ⲛⲓⲙ ⲛ̄ϣⲁⲁⲣ· ⲡϩⲓⲉⲣⲉⲩⲥ ⲉϥⲉⲟⲩⲉϩ ⲥⲁϩⲛⲉ· ⲁⲩⲱ̂ ⲉϥⲉⲉⲓⲱ̂ ⲉⲃⲟⲗ ⲙ̄ⲡⲉⲧⲉⲣⲉⲡϩ︦ⲣ︦ⲃ︦ ϩⲓⲱⲱϥ· ⲁⲩⲱ ⲉⲣⲉⲡϩⲓⲉⲣⲉⲩⲥ ⲡⲱⲣϫ̄ ⲉⲃⲟⲗ ⲙⲡϩ︦ⲣ︦ⲃ︦ ⲉⲧⲙ̄ⲙⲁⲩ ⲛ̄ⲥⲁϣϥ︦ ⲛ̄ϩⲟⲟⲩ ⲛⲥⲟⲡ ⲥⲛⲁⲩ· ⲁⲩⲱ ⲉⲣⲉⲡϩⲓⲉⲣⲉⲩⲥ ⲛⲁⲩ ⲙⲛ̄ⲛ̄ⲥⲁⲛ̄ⲥⲉⲉⲓⲱ̂ ⲉⲃⲟⲗ ⲙ̄ⲡϩ︦ⲣ︦ⲃ︦ ⲉⲧⲙ̄ⲙⲁⲩ· ⲁⲩⲱ ⲡϩ︦ⲣ︦ⲃ︦ ⲙ̄ⲡⲉϥⲙⲟⲟϣⲉ ⲟⲩ ⲁⲕⲁⲑⲁⲣⲧⲟⲛ ⲡⲉ· ⲉⲩⲉⲣⲟⲕϩϥ︦ ϩⲛ̄ ⲟⲩⲥⲁⲧⲉ· ϫⲉ ⲁϥⲧⲁϫⲣⲟ ϩⲙ̄ ⲡϩⲟⲓ̈ⲧⲉ· ⲏ̄ ⲡⲉϣⲧⲓⲧ· ⲏ̄ ⲡⲃⲏⲕⲉ· ⲁⲩⲱ ⲉⲣϣⲁⲛ ⲡϩⲓⲉⲣⲉⲩⲉ ⲛⲁⲩ ⲉⲡϩ︦ⲣ︦ⲃ︦ ⲉϥⲕⲣ︦ⲙ︦ⲣⲱⲙ ⲙⲛ̄ⲛ̄ⲥⲁⲛ̄ⲥⲉⲉⲓⲁⲁϥ ⲉⲃⲟⲗ ⲉϥⲉⲡⲁϩϥ︦ ⲛϥ︦ϥⲓⲧϥ︦ ⲙ̄ⲙⲁⲩ ⲉⲃⲟⲗ ϩⲙ̄ ⲡϩⲟⲓ̈ⲧⲉ· ⲏ̄ ⲉⲃⲟⲗ ϩⲙ̄ ⲡϣⲁⲁⲣ· ⲏ ⲉⲃⲟⲗ ϩⲙ̄ ⲡⲉϣⲧⲓⲧ· ⲏ ⲉⲃⲟⲗ ϩⲙ̄ ⲡⲃⲏⲉⲕⲉ ⲉϥϣⲁⲛⲟⲩⲱⲛϩ︦ ⲇⲉ ⲉⲃⲟⲗ· ϩⲙ̄ ⲡϩⲟⲓ̈ⲧⲉ· ⲏ̄ ⲡⲉϣⲧⲓⲧ· ⲏ̄ ⲡⲃⲏⲕⲉ· ⲏ̄ ⲥⲕⲉⲟⲥ ⲛⲓⲙ ⲛ̄ϣⲁⲁⲣ· ⲟⲩⲥⲱⲃϩ︦ ⲡⲉ ⲉⲁϥⲡⲓⲣⲉ· ⲡⲉⲧⲉⲣⲉⲡϩ︦ⲣ︦ⲃ︦ ⲉⲧⲙ̄ⲙⲁⲩ ⲛ̄ϩⲏⲧϥ︦ ⲉⲩⲉⲣⲟⲕϩϥ︦ ϩⲛ̄ ⲟⲩⲥⲁⲧⲉ· ⲁⲩⲱ ⲡⲉⲣϣⲱⲛ· ⲏ︦ ⲡⲉϣⲧⲓⲧ· ⲏ︦ ⲡⲃⲏⲕⲉ· ⲏ︦ ⲥⲕⲉⲟⲥ ⲛⲓⲙ ⲛ̄ϣⲁⲁⲣ ⲉⲧⲟⲩⲛⲁⲉⲓⲁⲁϥ ⲉⲃⲟⲗ· ⲛⲧⲉⲡϩ︦ⲣ︦ⲃ︦ ⲉⲧⲙ̄ⲙⲁⲩ ⲗⲟ ϩⲓⲱⲱϥ· ⲁⲩⲱ ⲉⲩⲉⲉⲓⲁⲁϥ ⲉⲃⲟⲗ ⲛ̄ⲕⲉⲥⲟⲡ ⲛϥ︦ϣⲱⲡⲉ ⲉϥⲧⲃ̄ⲃⲏⲩ· …
Biblical Reference
Lev.13.47-Lev.13.58
Lev.13.48 ⲏ ϩ︤ⲛ︥ ⲟⲩϣⲧⲓⲧ ⲏ ϩ︤ⲛ︥ ⲟⲩⲃⲏⲕⲉ ⲏ ϩ︤ⲛ︥ ϩⲉⲛⲉⲓⲁⲁⲩ ⲏ ϩ︤ⲛ︥ ϩⲉⲛⲥⲟⲣⲧ ⲏ ϩ︤ⲛ︥ ⲟⲩϣⲁⲁⲣ ⲏ ϩ︤ⲛ︥ ϣⲁⲁⲣ ⲛⲓⲙ ⲉϣⲁⲩⲣ̄ϩⲱⲃ ⲛ̄ϩⲧⲏϥ.
Lev.13.49 ⲁⲩⲱ ⲛ̄ⲧⲉⲡϩ︤ⲣ︦ⲃ︥ ϣⲱⲡⲉ ⲉϥⲟⲩⲉⲧⲟⲩⲱⲧ ⲏ ⲉϥⲙⲟⲣ︤ϣ︥ ϩ︤ⲙ︥ ⲡϩⲟⲓⲧⲉ ⲏ ϩ︤ⲙ︥ ⲡϣⲁⲁⲣ ⲏ ϩ︤ⲙ︥ ⲡⲉϣⲧⲓⲧ ⲏ ϩ︤ⲙ︥ ⲡⲃⲏⲕⲉ ⲏ ϩ︤ⲛ︥ ⲥⲕⲉⲩⲟⲥ ⲛⲓⲙ ⲛ̄ϣⲁⲁⲣ ⲉϣⲁⲩⲣ̄ϩⲱⲃ ⲛ̄ϩⲏⲧ︤ϥ︥ ⲡⲉⲓϩ︤ⲣ︦ⲃ︥ ⲟⲩⲥⲱⲃ︤ϩ︥ ⲡⲉ ⲉϥⲉⲧⲥⲁⲃⲟⲟⲩ ⲉⲡⲟⲩⲏⲏⲃ.
Lev.13.50 ⲛ̄ⲧⲉⲡϩⲓⲉⲣⲉⲩⲥ ϯϩⲧⲏϥ ⲉⲡϩ︤ⲣ︦ⲃ︥ ⲁⲩⲱ ⲡϩⲓⲉⲣⲉⲩⲥ ⲉϥⲉⲡⲱⲣ︤ϫ︥ ⲉⲃⲟⲗ ⲙ̄ⲡϩ︤ⲣ︦ⲃ︥ ⲉⲧⲙ̄ⲙⲁⲩ ⲛ̄ⲥⲁϣ︤ϥ︥ ⲛ̄ϩⲟⲟⲩ.
Lev.13.51 ⲁⲩⲱ ⲉⲣⲉⲡϩⲓⲉⲣⲉⲩⲥ ⲛⲁⲩ ⲉⲡϩ︤ⲣ︦ⲃ︥ ⲙ̄ⲡⲙⲉϩⲥⲁϣ︤ϥ︥ ⲛ̄ϩⲟⲟⲩ ⲉⲣϣⲁⲛⲡϩ︤ⲣ︦ⲃ︥ ⲇⲉ ⲉⲧⲙ̄ⲙⲁⲩ ⲡⲱⲣ︤ϣ︥ ⲉⲃⲟⲗ ϩ︤ⲙ︥ ⲡϩⲟⲓⲧⲉ ⲏ ϩ︤ⲙ︥ ⲡⲉϣⲧⲓⲧ ⲏ ϩ︤ⲙ︥ ⲡⲃⲏⲕⲉ ⲏ ϩ︤ⲙ︥ ⲡϣⲁⲁⲣ ⲕⲁⲧⲁ ⲉⲓⲟⲡⲉ ⲛⲓⲙ ⲉϣⲁⲩⲁⲁⲩ ϩ︤ⲛ︥ ⲛ̄ϣⲁⲁⲣ ⲟⲩⲥⲱⲃ︤ϩ︥ ⲉϥⲙⲏⲛ ⲉⲃⲟⲗ ϩ︤ⲙ︥ ⲡϩ︤ⲣ︦ⲃ︥ ⲟⲩⲁⲕⲁⲑⲁⲣⲧⲟⲛ ⲡⲉ.
Lev.13.52 ⲉϥⲉⲣⲱⲕ︤ϩ︥ ⲙ̄ⲡϩⲟⲓⲧⲉ ⲏ ⲡⲉϣⲧⲓⲧ ⲏ ⲡⲃⲏⲕⲉ ⲏ ⲡⲥⲟⲣⲧ ⲏ ϩⲉⲛⲉⲓⲁⲁⲩ ⲏ ϩⲉⲛⲥⲕⲉⲩⲟⲥ ⲛⲓⲙ ⲛ̄ϣⲁⲁⲣ ⲉⲣϣⲁⲛⲡϩ︤ⲣ︦ⲃ︥ ⲙ̄ⲡⲥⲱⲃ︤ϩ︥ ⲉⲧⲙⲏⲛ ⲉⲃⲟⲗ ϣⲱⲡⲉ ⲛ̄ϩⲏⲧⲟⲩ ⲉⲩⲉⲣⲟⲕϩⲟⲩ ϩ︤ⲛ︥ ⲟⲩⲥⲁⲧⲉ.
Lev.13.53 ⲉⲣϣⲁⲛⲡϩⲓⲉⲣⲉⲩⲥ ⲇⲉ ⲛⲁⲩ ⲛ̄ⲧⲉⲧ︤ⲙ︥ⲡϩ︤ⲣ︦ⲃ︥ ⲉⲧⲙ̄ⲙⲁⲩ ⲙⲟⲟϣⲉ ⲉⲡⲱⲣ︤ϣ︥ ⲉⲃⲟⲗ ϩ︤ⲙ︥ ⲡϩⲟⲓⲧⲉ ⲏ ϩ︤ⲙ︥ ⲡⲉϣⲧⲓⲧ ⲏ ϩ︤ⲙ︥ ⲡⲃⲏⲕⲉ ⲏ ϩ︤ⲛ︥ ⲥⲕⲉⲩⲟⲥ ⲛⲓⲙ ⲛ̄ϣⲁⲁⲣ.
Lev.13.54 ⲡϩⲓⲉⲣⲉⲩⲥ ⲉϥⲉⲟⲩⲉϩⲥⲁϩⲛⲉ ⲁⲩⲱ ⲉϥⲉⲉⲓⲱ ⲉⲃⲟⲗ ⲙ̄ⲡⲉⲧⲉⲣⲉⲡϩ︤ⲣ︦ⲃ︥ ϩⲓⲱⲱϥ ⲁⲩⲱ ⲉⲣⲉⲡϩⲓⲉⲣⲉⲩⲥ ⲡⲱⲣ︤ϫ︥ ⲉⲃⲟⲗ ⲙ̄ⲡϩ︤ⲣ︦ⲃ︥ ⲉⲧⲙ̄ⲙⲁⲩ ⲛ̄ⲥⲁϣ︤ϥ︥ ⲛ̄ϩⲟⲟⲩ ⲛ̄ⲥ︤ⲡ︥ⲥⲛⲁⲩ.
Lev.13.55 ⲁⲩⲱ ⲉⲣⲉⲡϩⲓⲉⲣⲉⲩⲥ ⲛⲁⲩ ⲙ︤ⲛ︥ⲛ̄ⲥⲁ ⲛ̄ⲥⲉⲉⲓⲱ ⲉⲃⲟⲗ ⲙ̄ⲡϩ︤ⲣ︦ⲃ︥ ⲉⲧⲙ̄ⲙⲁⲩ ⲁⲩⲱ ⲡϩ︤ⲣ︦ⲃ︥ ⲛ︤ϥ︥ⲧ︤ⲙ︥ϣⲓⲃⲉ ⲙ̄ⲡⲉϥⲙⲁⲉⲓⲛ ⲁⲩⲱ ⲡϩ︤ⲣ︦ⲃ︥ ⲙ̄ⲡⲉϥⲙⲟⲟϣⲉ ⲟⲩⲁⲕⲁⲑⲁⲣⲧⲟⲛ ⲡⲉ ⲉⲩⲉⲣⲟⲕϩ︤ϥ︥ ϩ︤ⲛ︥ ⲟⲩⲥⲁⲧⲉ ϫⲉ ⲁϥⲧⲁϫⲣⲟ ϩ︤ⲙ︥ ⲡϩⲟⲓⲧⲉ ⲏ ϩ︤ⲙ︥ ⲡⲉϣⲧⲓⲧ ⲏ ϩ︤ⲙ︥ ⲡⲃⲏⲕⲉ.
Lev.13.56 ⲁⲩⲱ ⲉⲣϣⲁⲛⲡϩⲓⲉⲣⲉⲩⲥ ⲛⲁⲩ ⲉⲡϩ︤ⲣ︦ⲃ︥ ⲉϥⲕⲣ︤ⲙ︥ⲣⲱⲙ ⲙ︤ⲛ︥ⲛ̄ⲥⲁ ⲛ̄ⲥⲉⲉⲓⲁⲁϥ ⲉⲃⲟⲗ ⲉϥⲉⲡⲁϩ︤ⲧ︥ ⲉⲃⲟⲗ ϩ︤ⲙ︥ ⲡϩⲟⲓⲧⲉ ⲏ ⲉⲃⲟⲗ ϩ︤ⲙ︥ ⲡϣⲁⲁⲣ ⲏ ⲉⲃⲟⲗ ϩ︤ⲙ︥ ⲡⲉϣⲧⲓⲧ ⲏ ⲉⲃⲟⲗ ϩ︤ⲙ︥ ⲡⲃⲏⲕⲉ.
Lev.13.57 ⲉϥϣⲁⲛⲟⲩⲱⲛ︤ϩ︥ ⲇⲉ ⲉⲃⲟⲗ ⲟⲛ ϩ︤ⲙ︥ ⲡϩⲟⲓⲧⲉ ⲏ ϩ︤ⲙ︥ ⲡⲉϣⲧⲓⲧ ⲏ ϩ︤ⲙ︥ ⲡⲃⲏⲕⲉ ⲏ ϩ︤ⲛ︥ ⲥⲕⲉⲩⲟⲥ ⲛⲓⲙ ⲛ̄ϣⲁⲁⲣ ⲟⲩⲥⲱⲃ︤ϩ︥ ⲡⲉ ⲉⲁϥⲡⲓⲣⲉ ⲉⲩⲉⲣⲟⲕϩⲟⲩ ϩ︤ⲛ︥ ⲟⲩⲥⲁⲧⲉ ⲡⲉⲧⲉⲣⲉⲡϩ︤ⲣ︦ⲃ︥ ⲉⲧⲙ̄ⲙⲁⲩ ⲛ̄ϩⲏⲧ︤ϥ︥.
Lev.13.58 ⲁⲩⲱ ⲡϩⲟⲓⲧⲉ ⲏ ⲡⲉϣⲧⲓⲧ ⲏ ⲡⲃⲏⲕⲉ ⲏ ⲥⲕⲉⲩⲟⲥ ⲛⲓⲙ ⲛ̄ϣⲁⲁⲣ ⲉⲧⲟⲩⲛⲁⲉⲓⲁⲁϥ ⲉⲃⲟⲗ ⲛ̄ⲧⲉⲡϩ︤ⲣ︦ⲃ︥ ⲉⲧⲙ̄ⲙⲁⲩ ⲗⲟ ϩⲓⲱⲱϥ ⲉⲩⲉⲉⲓⲁⲁϥ ⲉⲃⲟⲗ ⲛ̄ⲕⲉⲥⲟⲡ ⲛ︤ϥ︥ϣⲱⲡⲉ ⲉϥⲧ︤ⲃ︥ⲃⲏⲩ.
Edition
Boud’hors, Anne. Le Canon 8 de Chénouté. Introduction, Édition Critique. Vol. 1. 2 vols. Le Caire, 2013, 179:1-181:31