Sahidic Bible Citation1070
Shenoute, Canon 8 previous | next
Citation Text
… ⲁⲡϫⲟⲉⲓⲥ ϫⲟⲟⲥ ⲙ̄ⲙⲱⲩ̈ⲥⲏⲥ ⲙⲛ̄ ⲁⲁⲣⲱⲛ· ϫⲉ ϯⲛⲁϯ· ⲏ︦ ϯⲛⲁⲟⲩⲱⲛϩ︦ ⲉⲃⲟⲗ ⲛ̄ϩⲉⲛϩⲣ︦ⲃ︦ ⲛ̄ⲥⲱⲃϩ︦ ϩⲛ̄ ⲛ̄ⲏⲓ̈ ⲉⲧϩⲙ̄ ⲡⲕⲁϩ ⲉⲧⲙ̄ⲙⲁⲩ ⲁⲩⲱ ⲉϥⲉⲉⲓ ⲛ̄ϭⲓ ⲡⲉⲧⲉⲡⲱϥ ⲡⲉ ⲡⲏⲓ̈ ⲛϥ︦ⲧⲁⲙⲉ ⲡϩⲓⲉⲣⲉⲩⲥ ⲉϥϫⲱ ⲙ̄ⲙⲟⲥ ϫⲉ ⲉϣϫⲉ ⲟⲩϩⲣ̄︦ⲃ︦ ⲛ̄ⲥⲱⲃϩ︦ ⲡⲉⲛⲧⲁⲓ̈ⲛⲁⲩ ⲉⲣⲟϥ ϩⲙ̄ ⲡⲁⲏⲓ̈· ⲁⲩⲱ ⲉⲣⲉⲡϩⲓⲉⲣⲉⲩⲥ ⲟⲩⲉϩⲥⲁϩⲛⲉ ⲉⲧⲣⲉⲩⲡⲱⲱⲛⲉ ⲉⲃⲟⲗ ⲙ̄ⲡⲥⲟⲃⲧⲉ· ⲙ̄ⲡⲏⲓ̈ ϩⲁⲑⲏ ⲙⲡⲁⲧⲉ ⲡϩⲓⲉⲣⲉⲩⲥ ⲃⲱⲕ ⲉϩⲟⲩⲛ ⲉⲛⲁⲩ ⲉⲡⲏⲓ̈ ϫⲉ ⲛ̄ⲛⲉⲩϫⲱϩⲙ̄ ⲛ̄ϭⲓ ⲛⲉⲧϩⲙ̄ ⲡⲏⲓ̈· ⲁⲩⲱ ⲙⲛ̄ⲛ̄ⲥⲁ ⲛⲁⲓ̈ ⲉⲣⲉⲡϩⲓⲉⲣⲉⲩⲥ ⲛⲁⲩ ⲉⲡϩ︦ⲣ︦ⲃ︦ ⲙ̄ⲡⲥⲱⲃϩ︦ ϩⲛ̄ ⲛⲉϫⲏ ⲙ̄ⲡⲏⲓ̈ ⲛ̄ϩⲉⲛⲟⲩⲗ̄ⲡⲉ ⲉⲩⲟⲩⲉⲧⲟⲩⲱⲧ· ⲏ︦ ⲉⲩⲙⲟⲣϣ̄· ⲁⲩⲱ ⲡⲉⲩⲉⲓⲛⲉ ⲉϥⲑⲃ̄ⲃⲓⲏⲩ ϩⲛ̄ ⲛⲉϫⲏ ⲙ̄ⲡⲏⲓ̈· ⲁⲩⲱ ⲡϩⲓⲉⲣⲉⲩⲥ ⲉϥⲉⲣ̄ⲡⲃⲟⲗ ⲙ̄ⲡⲏⲓ̈ ⲉⲣⲙ̄ⲡⲣⲟ ⲙ̄ⲡⲏⲓ̈· ⲛ̄ⲧⲉ ⲡϩⲓⲉⲣⲉⲩⲥ ⲡⲱⲣϫ̄ ⲉⲃⲟⲗ ⲙ̄ⲡⲏⲓ̈ ⲛ̄ⲥⲁϣϥ︦ ⲛ̄ϩⲟⲟⲩ· ⲁⲩⲱ ⲉⲣⲉⲡϩⲓⲉⲣⲉⲩⲥ ⲕⲧⲟϥ ϩⲙ̄ ⲡⲙⲉϩⲥⲁϣϥ︦ ⲛ̄ϩⲟⲟⲩ ⲉⲛⲁⲩ ⲉⲡⲏⲓ̈· ⲁⲩⲱ ⲉⲓⲥ ϩⲏⲏⲧⲉ ⲁⲡϩ︦ⲣ︦ⲃ︦ ⲙ̄ⲡⲥⲱⲃϩ ϫⲱⲱⲣⲉ ⲉⲃⲟⲗ ϩⲛ̄ ⲛⲉϫⲏ ⲙ̄ⲡⲏⲓ̈· ⲁⲩⲱ ⲉⲣⲉ ⲡϩⲓⲉⲣⲉⲩⲥ ⲟⲩⲉϩⲥⲁϩⲛⲉ ⲛ̄ⲥⲉ ⲡⲱⲣⲕ̄ ⲛ̄ⲛ̄ⲱⲛⲉ ⲛ̄ⲧⲁ ⲡϩ︦︦ⲃ︦ ⲙ̄ⲡⲥⲱⲃϩ︦ ϣⲱⲡⲉ ϩⲓⲱⲟⲩ· ⲁⲩⲱ ⲉⲩⲉⲛⲟϫⲟⲩ ⲡⲃⲟⲗ ⲛ̄ⲧⲡⲟⲗⲓⲥ ⲉⲩⲙⲁ ⲉϥϫⲁϩⲙ̄· ⲁⲩⲱ ⲡϩⲟⲩⲛ ⲙ̄ⲡⲏⲓ̈ ⲉⲩⲉϩⲟⲕϥ︦ ⲉⲃⲟⲗ ⲉϥⲕⲱⲧⲉ· ⲛ̄ⲥⲉ ⲡⲱϩⲧ̄ ⲙ̄ⲡⲕⲁϩ ⲛ̄ⲧⲁⲩϩⲟⲕϥ︦ ⲉⲃⲟⲗ ⲡⲃⲟⲗ ⲛ̄ⲧⲡⲟⲗⲓⲥ ⲉⲩⲙⲁ ⲉϥϫⲁϩⲙ̄· ⲁⲩⲱ ⲉⲩⲉϫⲓ ⲛ̄ϩⲉⲛⲕⲉⲱ̂ⲛⲉ ⲉⲁⲩϩⲟⲕⲟⲩ ⲉⲃⲟⲗ ⲛ̄ⲥⲉ ⲛⲟϫⲟⲩ ⲉⲡⲙⲁ ⲛ̄ⲛⲉⲓ̈ⲱⲛⲉ ⲛ̄ⲧⲁⲩϥⲓⲧⲟⲩ ⲙ̄ⲙⲁⲩ· ⲁⲩⲱ ⲉⲩⲉϫⲓ ⲛ̄ⲕⲉⲕⲁϩ ⲛ̄ⲃⲣ̄ⲣⲉ ⲛ̄ⲥⲉ ⲥⲱⲗϭ̄ ⲙ̄ⲡⲏⲓ̈· ⲉϥϣⲁⲛⲕⲧⲟϥ ⲇⲉ ⲛ̄ϭⲓ ⲡϩ︦ⲣ︦ⲃ︦ ⲙ̄ⲡⲥⲱⲃϩ︦· ⲁⲩⲱ ⲛϥ︦ⲡⲓⲣⲉ ϩⲙ̄ ⲡⲏⲓ̈ ⲙⲛ̄ⲛ̄ⲥⲁ ⲛ̄ⲥⲉϥⲓ ⲙ̄ⲙⲁⲩ ⲛⲛⲉⲓ̈ⲱⲛⲉ· ⲁⲩⲱ ⲙⲛ̄ⲛ̄ⲥⲁ ⲛ̄ⲥⲉϩⲱⲱⲕⲉ ⲉⲃⲟⲗ ⲙⲡⲏⲓ̈· ⲁⲩⲱ ⲙⲛ̄ⲛ̄ⲥⲁ ⲛ̄ⲥⲉⲥⲟⲗϭϥ︦ ⲛ̄ⲕⲉⲥⲟⲡ· ⲁⲩⲱ ⲉⲣⲉⲡϩⲓⲉⲣⲉⲩⲥ ⲃⲱⲕ ⲉϩⲟⲩⲛ· ⲁⲩⲱ ⲉϥⲉϯϩⲧⲏϥ ϫⲉ ⲛⲉⲁⲡϩ︦ⲣ︦ⲃ︦ ⲙ̄ⲡⲥⲱⲃϩ ϫⲱⲱⲣⲉ ⲉⲃⲟⲗ ϩⲙ̄ ⲡⲏⲓ̈· ⲟⲩⲥⲱⲃϩ︦ ⲡⲉ ⲉϥⲙⲏⲛ ⲉⲃⲟⲗ ϩⲙ̄ ⲡⲏⲓ̈· ⲡⲏⲓ̈ ⲉⲧⲙ̄ⲙⲁⲩ ⲉⲧϫⲁϩⲙ̄ ⲉⲩⲉϣⲣ̄ϣⲱⲣϥ︦· ⲁⲩⲱ ⲛⲉϥϣⲉ· ⲙⲛ̄ ⲛⲉϥⲱⲛⲉ· ⲙⲛ̄ ⲡⲉϥⲕⲉⲕⲁϩ ⲧⲏⲣϥ︦ ⲉⲩⲉϫⲓⲧⲟⲩ ⲙ̄ⲡⲃⲟⲗ ⲛ̄ⲧⲡⲟⲗⲓⲥ ⲉⲩⲙⲁ ⲉϥϫⲁϩⲙ̄· ⲁⲩⲱ ⲡⲉⲧⲛⲁⲣⲡϩⲟⲩ(ⲛ) ⲙ̄ⲡⲏⲓ̈ ⲛ̄ⲛⲉϩⲟⲟⲩ ⲧⲏⲣⲟⲩ ⲉⲧϥ︦ⲛⲁⲁⲁⲩ ⲉϥⲛⲏϩ ⲉⲃⲟⲗ· ⲉϥⲉϣⲱⲡⲉ ⲛ̄ⲁⲕⲁⲑⲁⲣⲧⲟⲥ ϣⲁⲡⲛⲁⲩ ⲛ̄ⲣⲟⲩϩⲉ· ⲁⲩⲱ ⲡⲉⲧⲛⲁⲛ̄ⲕⲟⲧⲕ̄ ϩⲙ̄ ⲡⲏⲓ̈ ⲉϥⲉϣⲱⲙ ⲛ̄ⲛⲉϥϩⲟⲓ̈ⲧⲉ· ⲛϥ︦ϣⲱⲡⲉ ⲛ̄ⲁⲕⲁⲑⲁⲣⲧⲟⲥ ϣⲁ ⲡⲛⲁⲩ ⲛ̄ⲣⲟⲩϩⲉ· ⲁⲩⲱ ⲡⲉⲧⲛⲁⲟⲩⲱⲙ ϩⲙ̄ ⲡⲏⲓ̈· ⲉϥⲉϣⲱⲙ ⲛ̄ⲛⲉϥϩⲟⲓ̈ⲧⲉ· ⲛϥ︦ϣⲱⲡⲉ ⲛ̄ⲁⲕⲁⲑⲁⲣⲧⲟⲥ ϣⲁⲡⲛⲁⲩ ⲛ̄ⲣⲟⲩϩⲉ· ⲉⲣϣⲁⲛ ⲡϩⲓⲉⲣⲉⲩⲥ ⲇⲉ ⲉⲓ̄ ⲛϥ︦ⲃⲱⲕ ⲉϩⲟⲩⲛ ⲛϥ︦ⲛⲁⲩ· ⲁⲩⲱ ⲉⲓⲥ ϩⲏⲏⲧⲉ ϩⲛ̄ ⲟⲩⲡⲱⲣϣ︦ ⲙ̄ⲡϥ︦ⲡⲱⲣϣ︦ ⲉⲃⲟⲗ ⲛ̄ϭⲓ ⲡϩ︦ⲣ︦ⲃ ⲙ̄ⲡⲥⲱⲃϩ︦ ϩⲙ̄ⲡⲏⲓ̈· ⲙⲛ̄ⲛ̄ⲥⲁ ⲛ̄ⲥⲉⲥⲱⲗϭ︦ ⲙ̄ⲡⲏⲓ̈· ⲡϩⲓⲉⲣⲉⲩⲥ ⲉϥⲉⲕⲁⲑⲁⲣⲓⲍⲉ ⲙ̄ⲡⲏⲓ̈· ⲉⲧⲃⲉ ϫⲉ ⲁⲡⲙⲁⲉⲓⲛ ⲉⲧⲙ̄ⲙⲁⲩ ⲗⲟ ϩⲓⲱⲱϥ· …
Biblical Reference
Lev.14.33-Lev.14.48
Lev.14.34 ϯⲛⲁϯ ⲏ ϯⲛⲁⲟⲩⲱⲛ︤ϩ︥ ⲉⲃⲟⲗ ⲛ̄ϩⲉⲛϩ︤ⲣ︦ⲃ︥ ⲛ̄ⲥⲱⲃ︤ϩ︥ ϩ︤ⲛ︥ ⲛ̄ⲏⲓ ⲉⲧϩ︤ⲙ︥ⲡⲕⲁϩ ⲉⲧⲙ̄ⲙⲁⲩ.
Lev.14.35 ⲁⲩⲱ ⲉϥⲉⲉⲓ ⲛ̄ϭⲓ ⲡⲉⲧⲉⲡⲱϥ ⲡⲉ ⲡⲏⲓ ⲛ︤ϥ︥ⲧⲁⲙⲉⲡϩⲓⲉⲣⲉⲩⲥ ⲉϥϫⲱ ⲙ̄ⲙⲟⲥ ϫⲉ ⲉϣϫⲉ ⲟⲩϩ︤ⲣ︦ⲃ︥ ⲛ̄ⲥⲱⲃ︤ϩ︥ ⲡⲉⲛⲧⲁⲓⲛⲁⲩ ⲉⲣⲟϥ ϩ︤ⲙ︥ ⲡⲁⲏⲓ.
Lev.14.36 ⲁⲩⲱ ⲉⲣⲉⲡϩⲓⲉⲣⲉⲩⲥ ⲟⲩⲉϩⲥⲁϩⲛⲉ ⲉⲧⲣⲉⲩⲡⲱⲱⲛⲉ ⲉⲃⲟⲗ ⲙ̄ⲡⲥⲟⲃⲧⲉ ⲙ̄ⲡⲏⲓ ϩⲁⲑⲏ ⲙ̄ⲡⲁⲧⲉⲡϩⲓⲉⲣⲉⲩⲥ ⲃⲱⲕ ⲉϩⲟⲩⲛ ⲉⲛⲁⲩ ⲉⲡⲏⲓ ϫⲉ ⲛ̄ⲛⲉⲩϫⲱϩ︤ⲙ︥ ⲛ̄ϭⲓ ⲛⲉⲧϩ︤ⲙ︥ⲡⲏⲓ ⲁⲩⲱ ⲙ︤ⲛ︥ⲛ̄ⲥⲁ ⲛⲁⲓ̈.
Lev.14.37 ⲉⲣⲉⲡϩⲓⲉⲣⲉⲩⲥ ⲛⲁⲩ ⲉⲡϩ︤ⲣ︦ⲃ︥ ⲙ̄ⲡⲥⲱⲃ︤ϩ︥ ϩ︤ⲛ︥ ⲛⲉϫⲏ ⲙ̄ⲡⲏⲓ ⲛ̄ϩⲉⲛⲟⲩⲗⲡⲉ ⲉⲩⲟⲩⲉⲧⲟⲩⲱⲧ ⲏ ⲉⲩⲙⲟⲣ︤ϣ︥ ⲁⲩⲱ ⲡⲉⲩⲉⲓⲛⲉ ⲉϥⲑ︤ⲃ︥ⲃⲓⲏⲩ ϩ︤ⲛ︥ ⲛⲉϫⲏ ⲙ̄ⲡⲏⲓ.
Lev.14.38 ⲁⲩⲱ ⲡϩⲓⲉⲣⲉⲩⲥ ⲉϥⲉⲣ̄ⲡⲃⲟⲗ ⲙ̄ⲡⲏⲓ ⲉⲣ︤ⲙ︥ ⲡⲣⲟ ⲙ̄ⲡⲏⲓ ⲛ̄ⲧⲉⲡϩⲓⲉⲣⲉⲩⲥ ⲡⲱⲣ︤ϫ︥ ⲉⲃⲟⲗ ⲙ̄ⲡⲏⲓ ⲛ̄ⲥⲁϣ︤ϥ︥ ⲛ̄ϩⲟⲟⲩ.
Lev.14.39 ⲁⲩⲱ ⲉⲣⲉⲡϩⲓⲉⲣⲉⲩⲥ ⲕⲧⲟϥ ϩ︤ⲙ︥ ⲡⲙⲉϩⲥⲁϣ︤ϥ︥ ⲛ̄ϩⲟⲟⲩ ⲉⲛⲁⲩ ⲉⲡⲏⲓ ⲁⲩⲱ ⲉⲓⲥ ϩⲏⲏⲧⲉ ⲁⲡϩ︤ⲣ︦ⲃ︥ ⲙ̄ⲡⲥⲱⲃ︤ϩ︥ ϫⲱⲱⲣⲉ ⲉⲃⲟⲗ ϩ︤ⲛ︥ ⲛⲉϫⲏ ⲙ̄ⲡⲏⲓ.
Lev.14.40 ⲁⲩⲱ ⲉⲣⲉⲡϩⲓⲉⲣⲉⲩⲥ ⲟⲩⲉϩⲥⲁϩⲛⲉ ⲛ̄ⲥⲉⲡⲱⲣ︤ⲕ︥ ⲛ̄ⲛ̄ⲱⲛⲉ ⲛ̄ⲧⲁⲡϩ︤ⲣ︦ⲃ︥ ⲙ̄ⲡⲥⲱⲃ︤ϩ︥ ϣⲱⲡⲉ ϩⲓⲱⲟⲩ ⲁⲩⲱ ⲉⲩⲉⲛⲟϫⲟⲩ ⲡⲃⲟⲗ ⲛ̄ⲧⲡⲟⲗⲓⲥ ⲉⲩⲙⲁ ⲉϥϫⲁϩ︤ⲙ︥.
Lev.14.41 ⲁⲩⲱ ⲡϩⲟⲩⲛ ⲙ̄ⲡⲏⲓ ⲉⲩⲉϩⲟⲕ︤ϥ︥ ⲉⲃⲟⲗ ⲉϥⲕⲱⲧⲉ ⲛ̄ⲥⲉⲡⲱϩ︤ⲧ︥ ⲙ̄ⲡⲕⲁϩ ⲛ̄ⲧⲁⲩϩⲟⲕ︤ϥ︥ ⲉⲃⲟⲗ ⲡⲃⲟⲗ ⲛ̄ⲧⲡⲟⲗⲓⲥ ⲉⲩⲙⲁ ⲉϥϫⲁϩ︤ⲙ︥.
Lev.14.42 ⲁⲩⲱ ⲉⲩⲉϫⲓ ⲛ̄ϩⲉⲛⲕⲉⲱⲛⲉ ⲉⲁⲩϩⲟⲕⲟⲩ ⲉⲃⲟⲗ ⲛ̄ⲥⲉⲛⲟϫⲟⲩ ⲉⲡⲙⲁ ⲛ̄ⲛⲉⲓⲱⲛⲉ ⲛ̄ⲧⲁⲩϥⲓⲧⲟⲩ ⲙ̄ⲙⲁⲩ ⲁⲩⲱ ⲉⲩⲉϫⲓ ⲛ̄ⲕⲉⲕⲁϩ ⲛ̄ⲃ︤ⲣ︥ⲣⲉ ⲛ̄ⲥⲉⲥⲱⲗ︤ϭ︥ ⲙ̄ⲡⲏⲓ.
Lev.14.43 ⲉϥϣⲁⲛⲕⲧⲟϥ ⲇⲉ ⲛ̄ϭⲓ ⲡϩ︤ⲣ︦ⲃ︥ ⲙ̄ⲡⲥⲱⲃ︤ϩ︥ ⲁⲩⲱ ⲛ︤ϥ︥ⲡⲓⲣⲉ ϩ︤ⲙ︥ ⲡⲏⲓ ⲙ︤ⲛ︥ⲛ̄ⲥⲁ ⲛ︤ⲥ︥ⲉϥⲓ ⲙ̄ⲙⲁⲩ ⲛ̄ⲛⲉⲓⲱⲛⲉ ⲁⲩⲱ ⲙ︤ⲛ︥ⲛ̄ⲥⲁ ⲛ̄ⲥⲉϩⲱⲱⲕⲉ ⲉⲃⲟⲗ ⲙ̄ⲡⲏⲓ ⲁⲩⲱ ⲙ︤ⲛ︥ⲛ̄ⲥⲁ ⲛ̄ⲥⲉⲥⲟⲗϭ︤ϥ︥ ⲛ̄ⲕⲉⲥⲟⲡ.
Lev.14.44 ⲁⲩⲱ ⲉⲣⲉⲡϩⲓⲉⲣⲉⲩⲥ ⲃⲱⲕ ⲉϩⲟⲩⲛ ⲁⲩⲱ ⲉϥⲉϯϩⲧⲏϥ ϫⲉ ⲛⲉⲁⲡϩ︤ⲣ︦ⲃ︥ ⲙ̄ⲡⲥⲱⲃ︤ϩ︥ ϫⲱⲱⲣⲉ ⲉⲃⲟⲗ ϩ︤ⲙ︥ ⲡⲏⲓ ⲟⲩⲥⲱⲃ︤ϩ︥ ⲡⲉ ⲉϥⲙⲏⲛ ⲉⲃⲟⲗ ϩ︤ⲙ︥ ⲡⲏⲓ ⲡⲏⲓ ⲉⲧⲙ̄ⲙⲁⲩ ⲉⲧϫⲁϩ︤ⲙ︥.
Lev.14.45 ⲉⲩⲉϣ︤ⲣ︥ϣⲱⲣ︤ϥ︥ ⲁⲩⲱ ⲛⲉϥϣⲉ ⲙ︤ⲛ︥ ⲛⲉϥⲱⲛⲉ ⲙ︤ⲛ︥ ⲡⲉϥⲕⲁϩ ⲧⲏⲣ︤ϥ︥ ⲉⲩⲉϫⲓⲧⲟⲩ ⲙ̄ⲡⲃⲟⲗ ⲛ̄ⲧⲡⲟⲗⲓⲥ ⲉⲩⲙⲁ ⲉϥϫⲁϩ︤ⲙ︥.
Lev.14.46 ⲁⲩⲱ ⲡⲉⲧⲛⲁⲣ̄ⲡϩⲟⲩⲛ ⲙ̄ⲡⲏⲓ ⲛ̄ⲛⲉϩⲟⲟⲩ ⲧⲏⲣⲟⲩ ⲉⲧϥ̄ⲛⲁⲁⲁⲩ ⲉϥⲛⲏϩ ⲉⲃⲟⲗ ⲉϥⲉϣⲱⲡⲉ ⲛ̄ⲁⲕⲁⲑⲁⲣⲧⲟⲥ ϣⲁ ⲡⲛⲁⲩ ⲛ̄ⲣⲟⲩϩⲉ.
Lev.14.47 ⲁⲩⲱ ⲡⲉⲧⲛⲁⲛ̄ⲕⲟⲧ︤ⲕ︥ ϩ︤ⲙ︥ ⲡⲏⲓ ⲉϥⲉϣⲱⲙ ⲛ̄ⲛⲉϥϩⲟⲓⲧⲉ ⲛ︤ϥ︥ϣⲱⲡⲉ ⲛ̄ⲁⲕⲁⲑⲁⲣⲧⲟⲥ ϣⲁ ⲡⲛⲁⲩ ⲛ̄ⲣⲟⲩϩⲉ ⲁⲩⲱ ⲡⲉⲧⲛⲁⲟⲩⲱⲙ ϩ︤ⲙ︥ ⲡⲏⲓ ⲉϥⲉϣⲱⲙ ⲛ̄ⲛⲉϥϩⲟⲓⲧⲉ ⲛ︤ϥ︥ϣⲱⲡⲉ ⲛ̄ⲁⲕⲁⲑⲁⲣⲧⲟⲥ ϣⲁ ⲡⲛⲁⲩ ⲛ̄ⲣⲟⲩϩⲉ.
Lev.14.48 ⲉⲣϣⲁⲛⲡϩⲓⲉⲣⲉⲩⲥ ⲇⲉ ⲉⲓ ⲛ︤ϥ︥ⲃⲱⲕ ⲉϩⲟⲩⲛ ⲛ︤ϥ︥ⲛⲁⲩ ⲁⲩⲱ ⲉⲓⲥ ϩⲏⲏⲧⲉ ϩ︤ⲛ︥ ⲟⲩⲡⲱⲣ︤ϣ︥ ⲙ̄ⲡ︤ϥ︥ⲡⲱⲣ︤ϣ︥ ⲉⲃⲟⲗ ⲛ̄ϭⲓ ⲡϩ︤ⲣ︦ⲃ︥ ⲙ̄ⲡⲥⲱⲃ︤ϩ︥ ϩ︤ⲙ︥ ⲡⲏⲓ ⲙ︤ⲛ︥ⲛ̄ⲥⲁ ⲛ̄ⲥⲉⲥⲱⲗ︤ϭ︥ ⲙ̄ⲡⲏⲓ ⲡϩⲓⲉⲣⲉⲩⲥ ⲉϥⲉⲕⲁⲑⲁⲣⲓⲍⲉ ⲙ̄ⲡⲏⲓ ⲉⲧⲃⲉ ϫⲉ ⲁⲡⲙⲁⲉⲓⲛ ⲉⲧⲙ̄ⲙⲁⲩ ⲗⲟ ϩⲓⲱⲱϥ.
Edition
Boud’hors, Anne. Le Canon 8 de Chénouté. Introduction, Édition Critique. Vol. 1. 2 vols. Le Caire, 2013, 181:42-184:19