Gen.49.1 ⲁⲓ̈ⲁⲕⲱⲃ ⲇⲉ ⲙⲟⲩⲧⲉ ⲉⲛⲉϥϣⲏⲣⲉ ⲡⲉϫⲁϥ ⲛⲁⲩ ϫⲉ ⲥⲱⲟⲩϩ ⲉϩⲟⲩⲛ ϫⲉ ⲉⲓ̈ⲉϫⲱ ⲛⲏⲧ︤ⲛ︥ ϫⲉ ⲟⲩ ⲡⲉⲧⲛⲁⲧⲱⲙ︤ⲛ︦ⲧ︥ ⲉⲣⲱⲧ︤ⲛ︥ ϩ︤ⲛ︥ ⲑⲁⲏ ⲛ̄ⲛⲉϩⲟⲟⲩ.
Gen.49.2 ⲥⲱⲟⲩϩ ⲉϩⲟⲩⲛ ⲛ̄ⲧⲉⲧ︤ⲛ︥ⲥⲱⲧ︤ⲙ︥ ⲉⲣⲟⲓ̈ ⲛ̄ϣⲏⲣⲉ ⲛ̄ⲓ̈ⲁⲕⲱⲃ ⲥⲱⲧ︤ⲙ︥ ⲉⲡⲓⲥⲣⲁⲏⲗ ⲡⲉⲧ︤ⲛ︥ⲉⲓⲱⲧ.
Gen.49.3 ϩⲣⲟⲩⲃⲏⲛ ⲡⲁϣ︤ⲣ︦ⲡ︥ⲙ̄ⲙⲓⲥⲉ ⲛ̄ⲧⲟⲕ ⲡⲉ ⲧⲁϭⲟⲙ ⲁⲩⲱ ⲧⲁⲣⲭⲏ ⲛ̄ⲛⲁϣⲏⲣⲉ ⲕⲛⲁϣ︤ⲧ︥ ⲉϣⲉⲉⲓ ⲛ̄ⲧ︤ⲕ︥ ⲟⲩⲁⲩⲑⲁⲇⲏⲥ.
Gen.49.4 ⲁⲕⲥⲟϣ︤ⲧ︥ ⲛ̄ⲛⲉⲕⲃ︤ⲣ︥ⲃ︤ⲣ︥ ⲛ̄ⲑⲉ ⲛ̄ⲟⲩⲙⲟⲟⲩ ⲁⲕⲁⲗⲉ ⲉϩⲣⲁⲓ̈ ⲉϫ︤ⲙ︥ ⲡⲙⲁ ⲛ̄ⲛ̄ⲕⲟⲧ︤ⲕ︥ ⲙ̄ⲡⲉⲕⲉⲓⲱⲧ ⲧⲟⲧⲉ ⲁⲕⲥⲱⲱϥ ⲙ̄ⲡⲉⲡⲣⲏϣ ⲛ̄ⲧⲁⲕⲟⲗ︤ⲕ︥ ⲉϩⲣⲁⲓ̈ ⲉϫⲱϥ.
Gen.49.5 ⲥⲩⲙⲉⲱⲛ ⲙ︤ⲛ︥ ⲗⲉⲩⲉⲓ ⲁⲩϫⲱⲕ ⲉⲃⲟⲗ ⲛ̄ⲟⲩϫⲓⲛ̄ϭⲟⲛ︤ⲥ︥ ϩ︤ⲙ︥ ⲡⲉⲩⲟⲩⲱϣ.
Gen.49.6 ⲛ̄ⲛⲉⲧⲁⲯⲩⲭⲏ ϣⲱⲡⲉ ϩ︤ⲙ︥ ⲡⲉⲩϣⲟϫⲛⲉ ⲁⲩⲱ ⲛ̄ⲛⲉⲛⲁⲟⲩⲱϣ ⲧⲁϫⲣⲟ ϩ︤ⲙ︥ ⲡⲉⲛⲧⲁⲩⲁⲁϥ ϫⲉ ϩⲣⲁⲓ̈ ϩ︤ⲙ︥ ⲡⲉⲩϭⲱⲛ︤ⲧ︥ ⲁⲩϩⲱⲧ︤ⲃ︥ ⲛ̄ϩⲉⲛⲣⲱⲙⲉ ⲁⲩⲱ ϩⲣⲁⲓ̈ ϩ︤ⲛ︥ ⲧⲉⲩⲉⲡⲉⲓⲑⲩⲙⲓⲁ ⲁⲩⲃ︤ⲗ︥ⲛ̄ⲕⲱⲃ︤ϩ︥ ⲛ̄ⲟⲩⲙⲁⲥⲉ.
Gen.49.7 ϥⲥϩⲟⲩⲟⲣⲧ ⲛ̄ϭⲓ ⲡⲉⲩϭⲱⲛ︤ⲧ︥ ϫⲉ ϥⲛⲁϣ︤ⲧ︥ ⲁⲩⲱ ⲧⲉⲩⲟⲣⲅⲏ ⲁⲥⲛ̄ϣⲟⲧ ϯⲛⲁⲡⲟϣⲟⲩ ϩ︤ⲛ︥ ⲓ̈ⲁⲕⲱⲃ ⲧⲁϫⲟⲟⲣⲟⲩ ⲉⲃⲟⲗ ϩ︤ⲙ︥ ⲡⲓⲥⲣⲁⲏⲗ.
Gen.49.8 ⲓ̈ⲟⲩⲇⲁ ⲛⲉⲕⲥⲛⲏⲩ ⲛⲁⲥⲙⲟⲩ ⲉⲣⲟⲕ ⲛⲉⲕϭⲓϫ ⲛⲁϣⲱⲡⲉ ⲉϫ︤ⲛ︥ ⲧϫⲓⲥⲉ ⲛ̄ⲛⲉⲕϫⲁϫⲉ ⲛ̄ⲥⲉⲟⲩⲱϣⲧ ⲛⲁⲕ ⲛ̄ϭⲓ ⲛ̄ϣⲏⲣⲉ ⲙ̄ⲡⲉⲕⲉⲓⲱⲧ.
Gen.49.9 ⲡⲁⲙⲁⲥ ⲙ̄ⲙⲟⲩⲓ̈ ⲓ̈ⲟⲩⲇⲁ ⲁⲕⲉⲓ ⲛⲁⲓ̈ ⲉϩⲣⲁⲓ̈ ϩ︤ⲛ︥ ⲟⲩϯⲟⲩⲱ ⲡⲁϣⲏⲣⲉ ⲁⲕⲛⲟϫ︤ⲕ︥ ⲁⲕⲛ̄ⲕⲟⲧ︤ⲕ︥ ⲛ̄ⲑⲉ ⲛ̄ⲛⲓⲙⲟⲩⲓ̈ ⲁⲩⲱ ⲛ̄ⲑⲉ ⲛ̄ⲛⲓⲙⲁⲥ ⲙ̄ⲙⲟⲩⲓ̈ ⲛⲓⲙ ⲡⲉⲧⲛⲁϣⲧⲟⲩⲛⲟⲥ︤ⲕ︥.
Gen.49.10 ⲛ̄ⲛⲉⲁⲣⲭⲱⲛ ⲱϫ︤ⲛ︥ ⲉⲃⲟⲗ ϩ︤ⲛ︥ ⲓ̈ⲟⲩⲇⲁ ⲟⲩⲇⲉ ϩⲏⲅⲟⲩⲙⲉⲛⲟⲥ ⲉⲃⲟⲗ ϩ︤ⲛ︥ ⲛⲉϥⲙⲏⲣⲟⲥ ϣⲁⲛⲧⲟⲩⲉⲓ ⲛ̄ϭⲓ ⲛⲉⲧⲕⲏ ⲛⲁϥ ⲉϩⲣⲁⲓ̈ ⲁⲩⲱ ⲛ̄ⲧⲟϥ ⲡⲉⲧⲉⲣⲉⲛ̄ϩⲉⲑⲛⲟⲥ ϭⲱϣ︤ⲧ︥ ⲉⲃⲟⲗ ϩⲏⲧ︤ϥ︥.
Gen.49.11 ⲉⲙⲟⲩⲣ ⲙ̄ⲡⲉϥⲥⲏϭ ⲉⲧⲃⲱ ⲛ̄ⲉⲗⲟⲟⲗⲉ ⲁⲩⲱ ⲡⲥⲏϭ ⲛ̄ⲧⲉϥⲉⲱ ⲉⲡϣ︤ⲗ︦ϩ︥ ϥⲛⲁⲉⲓⲱ ⲛ̄ⲧⲉϥⲥⲧⲟⲗⲏ ϩ︤ⲙ︥ ⲡⲏⲣ︤ⲡ︥ ⲁⲩⲱ ⲡⲉϥⲣ̄ϣⲱⲛ ϩ︤ⲙ︥ ⲡⲉⲥⲛⲟϥ ⲙ̄ⲡⲉⲗⲟⲟⲗⲉ.
Gen.49.12 ⲥⲉⲱⲣ︤ϣ︥ ⲛ̄ϭⲓ ⲛⲉϥⲃⲁⲗ ⲉⲃⲟⲗ ϩ︤ⲙ︥ ⲡⲏⲣ︤ⲡ︥ ⲁⲩⲱ ⲛⲉϥⲟⲃϩⲉ ⲟⲩⲟⲃ︤ϣ︥ ⲉϩⲟⲩⲉ ⲡⲉⲣⲱⲧⲉ.
Gen.49.13 ⲍⲁⲃⲟⲩⲗⲱⲛ ⲛⲁⲟⲩⲱϩ ϩⲓϫ︤ⲛ︥ ⲑⲁⲗⲁⲥⲥⲁ ⲛ︤ϥ︥ϣⲱⲡⲉ ϩⲓϫ︤ⲙ︥ ⲡⲙⲁⲙ̄ⲙⲟⲟⲛⲉ ⲛ̄ⲛⲉϫⲏⲩ ⲁⲩⲱ ⲛ︤ϥ︥ⲡⲱⲣ︤ϣ︥ ⲉⲃⲟⲗ ϣⲁϩⲣⲁⲓ̈ ⲉⲥⲓⲇⲱⲛ.
Gen.49.14 ⲓⲥⲁⲭⲁⲣ ⲁϥⲉⲡⲉⲓⲑⲩⲙⲓⲁ ⲉⲡⲡⲉⲧⲛⲁⲛⲟⲩϥ ⲉϥⲙ̄ⲧⲟⲛ ⲙ̄ⲙⲟϥ ⲛ̄ⲧⲙⲏⲏⲧⲉ ⲛ̄ⲛⲉⲕⲗⲏⲣⲟⲥ.
Gen.49.15 ⲁϥⲛⲁⲩ ⲉⲡⲉⲙⲧⲟⲛ ϫⲉ ⲛⲁⲛⲟⲩϥ ⲁⲩⲱ ⲡⲕⲁϩ ϫⲉ ϥⲕⲓⲱⲟⲩ .
Gen.49.16 […]
Gen.49.17 […]
Gen.49.18 […]
Gen.49.19 ⲅⲁⲇ ⲟⲩⲛⲟⲩ ⲛⲁⲡⲓⲣⲁⲍⲉ ⲙ̄ⲙⲟϥ ⲛ̄ⲧⲟϥ ⲇⲉ ϥⲛⲁϫⲓ ⲛ̄ⲥⲁ ⲛⲉⲩⲧⲁϭⲥⲉ.
Gen.49.20 ⲁⲥⲏⲣ ⲡⲉϥⲟⲉⲓⲕ ⲕⲓⲱⲟⲩ ⲁⲩⲱ ⲛ̄ⲧⲟϥ ⲡⲉⲧⲛⲁϯϩⲣⲉ ⲛ̄ⲛⲁⲣⲭⲱⲛ.
Gen.49.21 ⲛⲉⲫⲑⲁⲗⲓⲉⲓⲙ ⲡϣⲁⲩ ⲉⲧⲥⲁⲛⲁϣⲧ ⲉⲧϯ ⲛ̄ⲟⲩⲥⲁ ϩ︤ⲙ︥ ⲡⲉϥⲅⲉⲛⲏⲙⲁ.
Gen.49.22 ⲓ̈ⲱⲥⲏⲫ ⲡⲁϣⲏⲣⲉ ⲉⲧⲁⲩⲝⲁⲛⲁ ⲡⲁⲕⲟⲩⲓ̈ ⲛ̄ϣⲏⲣⲉ ⲛ̄ⲧⲁⲩⲕⲱϩ ⲉⲣⲟϥ ⲕⲱⲧⲉ ⲙ̄ⲙⲟⲕ ϣⲁⲣⲟⲓ̈.
Gen.49.23 ⲡⲉⲛⲧⲁⲩϣⲟϫⲛⲉ ⲉⲣⲟϥ ⲁⲩⲥⲁϩⲟⲩ ⲙ̄ⲙⲟϥ ⲁⲩϭⲱⲛ︤ⲧ︥ ⲉⲣⲟϥ ⲛ̄ϭⲓ ⲛ̄ϫⲟⲉⲓⲥ ⲛ̄ⲙ̄ⲡⲓⲧⲉ.
Gen.49.24 ⲁⲛⲉⲩⲡⲓⲧⲉ ⲟⲩⲱϣ︤ϥ︥ ϩ︤ⲛ︥ ⲟⲩϭⲟⲙ ⲁⲩⲱ ⲁⲩⲃⲱⲗ ⲉⲃⲟⲗ ⲛ̄ϭⲓ ⲙ̄ⲙⲟⲩⲧ ⲛ̄ⲛⲉⲩϭ︤ⲃ︥ⲟⲓ̈ ϩⲓⲧ︤ⲛ︥ ⲛ̄ϭⲓϫ ⲙ̄ⲡϫⲱⲱⲣⲉ ⲓ̈ⲁⲕⲱⲃ ⲁϥϯϭⲟⲙ ⲙ̄ⲡϫⲱⲱⲣⲉ ⲡⲓⲥⲣⲁⲏⲗ ϩ︤ⲙ︥ ⲡⲙⲁ ⲉⲧⲙ̄ⲙⲁⲩ ⲛ̄ϭⲓ ⲡⲛⲟⲩⲧⲉ ⲙ̄ⲡⲉⲕⲉⲓⲱⲧ.
Gen.49.25 ⲁⲩⲱ ⲁϥⲃⲟⲏⲑⲉⲓⲁ ⲉⲣⲟⲕ ⲛ̄ϭⲓ ⲡⲁⲛⲟⲩⲧⲉ ⲁϥⲥⲙⲟⲩ ⲉⲣⲟⲕ ϩ︤ⲙ︥ ⲡⲉⲥⲙⲟⲩ ⲛ̄ⲧⲡⲉ ϩⲓ ⲧⲡⲉ ⲁⲩⲱ ⲡⲉⲥⲙⲟⲩ ⲙ̄ⲡⲕⲁϩ ⲉⲧϫⲏⲕ ⲉⲃⲟⲗ ⲙ̄ⲡⲧⲏⲣ︤ϥ︥ ⲉⲧⲃⲉ ⲡⲉⲥⲙⲟⲩ ⲛ̄ⲛ̄ⲉⲕⲓⲃⲉ ⲙ︤ⲛ︥ ⲧⲟⲟⲧ.
Gen.49.26 ⲁϥϯϭⲟⲙ ⲙ̄ⲡⲉⲥⲙⲟⲩ ⲙ̄ⲡⲉⲕⲉⲓⲱⲧ ⲙ︤ⲛ︥ ⲧⲉⲕⲙⲁⲁⲩ ⲛ̄ϩⲟⲩⲟ ⲉⲡⲉⲥⲙⲟⲩ ⲛ̄ⲛ̄ⲧⲟⲟⲩ ⲉⲧⲙⲏⲛ ⲉⲃⲟⲗ ⲁⲩⲱ ⲛ̄ϩⲟⲩⲟ ⲉⲡⲉⲥⲙⲟⲩ ⲛ̄ⲛⲉⲕⲣⲱⲟⲩ ⲛ̄ϣⲁ ⲉⲛⲉϩ ⲉⲩⲉϣⲱⲡⲉ ⲉϩⲣⲁⲓ̈ ⲉϫ︤ⲛ︥ ⲧⲁⲡⲉ ⲛ̄ⲓ̈ⲱⲥⲏⲫ ⲁⲩⲱ ⲉϫ︤ⲛ︥ ⲧⲙⲏⲧⲉ ⲛ̄ⲧⲁⲡⲉ ⲛ̄ⲛⲉⲥⲛⲏⲩ ⲛ̄ⲧⲁϥϣⲱⲡⲉ ϩⲓϫⲱⲟⲩ.
Gen.49.27 ⲃⲉⲛⲓⲁⲙⲓⲛ ⲡⲟⲩⲱⲛ︤ϣ︥ ⲛ̄ⲣⲉϥⲧⲱⲣ︤ⲡ︥ ϥⲛⲁⲟⲩⲱⲙ ⲉⲧⲓ ⲙ̄ⲡⲛⲁⲩ ⲛ̄ϩⲧⲟⲟⲩⲉ ⲛ︤ϥ︥ϯϩⲣⲉ ⲙ̄ⲡⲛⲁⲩ ⲛ̄ⲣⲟⲩϩⲉ.
Gen.49.28 ⲛⲁⲓ̈ ⲧⲏⲣⲟⲩ ⲛⲉ ⲛ̄ϣⲏⲣⲉ ⲛ̄ⲓ̈ⲁⲕⲱⲃ ⲙ︤ⲛ︦ⲧ︥ⲥⲛⲟⲟⲩⲥ ⲙ̄ⲫⲩⲗⲏ ⲁⲩⲱ ⲛⲁⲓ̈ ⲛⲉⲛⲧⲁⲡⲉⲩⲉⲓⲱⲧ ϫⲟⲟⲩ ⲛⲁⲩ ⲁⲩⲱ ⲁϥⲥⲙⲟⲩ ⲉⲣⲟⲟⲩ ⲡⲟⲩⲁ ⲡⲟⲩⲁ ⲕⲁⲧⲁ ⲡⲉϥⲥⲙⲟⲩ.
Gen.49.29 ⲡⲉϫⲁϥ ⲇⲉ ⲛ̄ϭⲓ ⲓ̈ⲁⲕⲱⲃ ϫⲉ ⲁⲛⲟⲕ ⲥⲉⲛⲁⲟⲩⲁϩ︤ⲧ︥ ⲛ̄ⲛⲁϩ︤ⲣ︦ⲙ︥ ⲡⲁⲗⲁⲟⲥ ⲧⲱⲙ︤ⲥ︥ ⲙ̄ⲙⲟⲓ̈ ⲙ︤ⲛ︥ ⲛⲁⲉⲓⲟⲧⲉ ϩⲣⲁⲓ̈ ϩ︤ⲙ︥ ⲡⲉⲥⲡⲏⲗⲁⲓⲟⲛ ⲉⲧϩ︤ⲛ︥ⲧⲥⲱϣⲉ ⲛ̄ⲉⲫⲣⲟⲛ ⲡⲉⲭⲉⲧⲧⲁⲓⲟⲥ.
Gen.49.30 ϩ︤ⲛ︥ ⲟⲩⲙⲁ ⲛ̄ⲙ̄ϩⲁⲁⲩ ϩⲣⲁⲓ̈ ϩ︤ⲙ︥ ⲡⲉⲥⲡⲏⲗⲁⲓⲟⲛ ⲉⲧⲟ ⲛ̄ⲥⲛⲁⲩ ⲙ̄ⲡⲙ̄ⲧⲟ ⲉⲃⲟⲗ ⲙ̄ⲙⲁⲃⲣⲏ ϩ︤ⲙ︥ ⲡⲕⲁϩ ⲛ̄ⲛⲉⲭⲁⲛⲁⲛⲁⲓⲟⲥ ⲡⲉⲥⲡⲏⲗⲁⲓⲟⲛ ⲛ̄ⲧⲁⲁⲃⲣⲁϩⲁⲙ ϫⲡⲟϥ ⲉⲃⲟⲗ ϩⲓⲧⲟⲟⲧ︤ϥ︥ ⲛ̄ⲉⲫⲣⲱⲛ ⲡⲉⲭⲉⲧⲧⲁⲓⲟⲥ ⲉⲩⲙⲁ ⲛ̄ⲙ̄ϩⲁⲁⲩ.
Gen.49.31 ⲛ̄ⲧⲁⲩⲧⲱⲙ︤ⲥ︥ ϩⲣⲁⲓ̈ ϩ︤ⲙ︥ ⲡⲉⲓ̈ⲙⲁ ⲛ̄ⲁⲃⲣⲁϩⲁⲙ ⲙ︤ⲛ︥ ⲥⲁⲣⲣⲁ ⲧⲉϥⲥϩⲓⲙⲉ ⲛ̄ⲧⲁⲩⲧⲱⲙ︤ⲥ︥ ⲙⲙⲁⲩ ⲛ̄ⲓ̈ⲥⲁⲁⲕ ⲙ︤ⲛ︥ ϩⲣⲉⲃⲉⲕⲕⲁ ⲧⲉϥⲥϩⲓⲙⲉ ⲛ̄ⲧⲁⲩⲧⲱⲙ︤ⲥ︥ ⲛ̄ⲗⲓⲁ ⲙ̄ⲡⲉⲓ̈ⲙⲁ.
Gen.49.32 ⲉⲩⲕⲧⲏⲙⲁ ⲛ̄ⲧⲥⲱϣⲉ ⲙ︤ⲛ︥ ⲡⲙ̄ϩⲁⲁⲩ ⲉⲧⲛ̄ϩⲏⲧ︤ⲥ︥ .
Gen.49.33 […]