Ezek.1.1 ⲁⲥϣⲱⲡⲉ ϩⲛ ⲧⲙⲉϩⲙⲁⲁⲃ ⲛⲣⲟⲙⲡⲉ ⲙⲡⲙⲉϩϯⲟⲩ ⲛⲉⲃⲟⲧ ⲛⲥⲟⲩϯⲟⲩ ⲙⲡⲉⲃⲟⲧ ⲁⲛⲟⲕ ⲛⲉⲓϣⲟⲟⲡ ϩⲛ ⲧⲙⲏⲧⲉ ⲛⲧⲁⲓⲭⲙⲁⲗⲱⲥⲓⲁ ϩⲓϫⲙ ⲡⲉⲓⲉⲣⲟ ⲭⲟⲃⲁⲣ ⲁⲩⲱ ⲁⲩⲟⲩⲱⲛ ⲛϭⲓ ⲙⲡⲏⲩⲉ ⲁⲩⲱ ⲁⲓⲛⲁⲩ ⲉϩⲉⲛϩⲟⲣⲁⲥⲓⲥ ⲛⲧⲉ ⲡⲛⲟⲩⲧⲉ.
Ezek.1.2 ϩⲛ ϯⲟⲩ ⲙⲡⲉⲃⲟⲧ ϩⲛ ⲧⲙⲉϩϯ ⲛⲣⲟⲙⲡⲉ ⲙⲡⲡⲱⲱⲛⲉ ⲉⲃⲟⲗ ⲙⲡⲣⲣⲟ ⲓ̈ⲱⲁⲕⲓⲙ.
Ezek.1.3 ⲡϣⲁϫⲉ ⲙⲡϫⲟⲉⲓⲥ ⲁϥϣⲱⲡⲉ ϣⲁ ⲉⲓⲉⲍⲉⲕⲓⲏⲗ ⲡⲟⲩⲏⲏⲃ ⲡϣⲏⲣⲉ ⲛⲃⲟⲩⲍⲓ ϩⲙ ⲡⲕⲁϩ ⲛⲛⲉⲭⲁⲗⲇⲁⲓⲟⲥ ϩⲓϫⲙ ⲡⲉⲓⲉⲣⲟ ⲭⲟⲃⲁⲣ ⲁⲩⲱ ⲧϭⲓϫ ⲙⲡϫⲟⲉⲓⲥ ⲁⲥϣⲱⲡⲉ ⲉϩⲣⲁⲓ ⲉϫⲱⲓ.
Ezek.1.4 ⲁⲓⲛⲁⲩ ⲁⲩⲱ ⲉⲓⲥ ϩⲏⲏⲧⲉ ⲉⲓⲥ ⲟⲩⲡ︤ⲛ︦ⲁ︥ ⲉϥϫⲟⲥⲉ ⲉϥⲛⲏⲩ ⲉⲃⲟⲗ ϩⲙ ⲡⲉⲙϩⲓⲧ ⲉⲩⲛⲟⲩⲛⲟϭ ⲛⲕⲗⲟⲟⲗⲉ ⲛϩⲏⲧϥ ⲁⲩⲱ ⲟⲩⲟⲩⲟⲉⲓⲛ ⲙⲡⲉϥⲕⲱⲧⲉ ⲙⲛ ⲟⲩⲕⲱϩⲧ ⲉϥϯⲃⲣⲏϭⲉ ⲁⲩⲱ ϩⲛ ⲧⲉϥⲙⲏⲧⲉ ⲛⲑⲉ ⲙⲡⲉⲥⲙⲟⲧ ⲛⲟⲩⲱⲛⲉ ⲛⲉⲗⲉⲕⲧⲣⲓⲛⲟⲛ ϩⲛ ⲧⲙⲏⲧⲉ ⲙⲡⲕⲱϩⲧ ⲙⲛ ⲟⲩⲟⲩⲟⲉⲓⲛ ϩⲣⲁⲓ ⲛϩⲏⲧϥ.
Ezek.1.5 ⲁⲩⲱ ⲛⲉϥⲟ ϩⲛ ⲧⲉϥⲙⲏⲧⲉ ⲛϭⲓ ⲟⲩⲉⲓⲛⲉ ⲛϥⲧⲟⲟⲩ ⲛⲍⲱⲟⲛ ⲁⲩⲱ ⲧⲁⲓ ⲧⲉ ⲧⲉⲩϩⲟⲣⲁⲥⲓⲥ ⲟⲩⲉⲓⲛⲉ ⲛⲣⲱⲙⲉ ⲡⲉ ⲉⲛⲉϥϣⲟⲟⲡ ⲛϩⲏⲧⲟⲩ.
Ezek.1.6 ⲉⲩⲟⲩⲛ ϥⲧⲟⲟⲩ ⲛϩⲟ ϩⲓ ⲡⲟⲩⲁ ⲡⲟⲩⲁ ⲁⲩⲱ ϥⲧⲟⲟⲩ ⲛⲧⲛϩ ϩⲓ ⲡⲟⲩⲁ ⲡⲟⲩⲁ.
Ezek.1.7 ⲉⲣⲉⲛⲉⲩⲟⲩⲉⲣⲏⲧⲉ ⲥⲟⲩⲧⲱⲛ ⲁⲩⲱ ⲉⲩⲣⲏⲧ ⲛⲧⲛϩ ⲙⲛ ϩⲉⲛϯⲕ ⲛⲕⲱϩⲧ ⲛⲑⲉ ⲛⲟⲩϩⲟⲙⲛⲧ ⲉϥⲧⲁⲁⲧⲉ ⲁⲩⲱ ⲉⲩⲁⲥⲱⲟⲩ ⲛϭⲓ ⲛⲉⲩⲧⲛϩ.
Ezek.1.8 ⲉⲣⲉⲟⲩϭⲓϫ ⲛⲣⲱⲙⲉ ϩⲁ ⲡⲉⲥⲏⲧ ⲛⲛⲉⲩⲧⲛϩ ⲉⲩⲙⲟⲟϣⲉ ϩⲓ ⲡⲉⲩϥⲧⲟⲩⲥⲁ ⲁⲩⲱ ⲛⲉⲩϩⲟ ⲙⲡⲉϥⲧⲟⲟⲩ.
Ezek.1.9 ⲛⲉⲩⲕⲱⲧⲉ ⲙⲙⲟⲟⲩ ⲁⲛ ⲉⲡⲁϩⲟⲩ ϩⲙ ⲡⲧⲣⲉⲩⲙⲟⲟϣⲉ ⲡⲟⲩⲁ ⲡⲟⲩⲁ ⲛⲉⲩⲙⲟⲟϣⲉ ⲡⲉ ⲙⲡⲉⲙⲧⲟ ⲉⲃⲟⲗ ⲙⲡⲉⲩϩⲟ.
Ezek.1.10 ⲁⲩⲱ ⲡⲉⲓⲛⲉ ⲛⲛⲉⲩϩⲟ ⲟⲩϩⲟ ⲛⲣⲱⲙⲉ ⲙⲛ ⲟⲩϩⲟ ⲙⲙⲟⲩⲓ ⲛⲟⲩⲛⲁⲙ ⲙⲙⲟⲟⲩ ⲙⲡⲉϥⲧⲟⲟⲩ ⲁⲩⲱ ⲟⲩϩⲟ ⲙⲙⲁⲥⲉ ⲛϩⲃⲟⲩⲣ ⲙⲙⲟⲟⲩ ⲙⲡⲉϥⲧⲟⲟⲩ ⲙⲛ ⲟⲩϩⲟ ⲛⲁⲉⲧⲟⲥ.
Ezek.1.11 […]
Ezek.1.12 […]
Ezek.1.13 […]
Ezek.1.14 […]
Ezek.1.15 ⲁⲩⲱ ⲉⲓⲥ ⲟⲩⲧⲣⲟⲭⲟⲥ ϩⲓϫⲙ ⲡⲕⲁϩ ⲉⲩⲁⲙⲁϩⲧⲉ.
Ezek.1.16 ⲙⲙⲟϥ ϩⲓⲧⲙ ⲡⲉϥⲧⲟⲟⲩ ⲛⲍⲱⲟⲛ.
Ezek.1.17 […]
Ezek.1.18 ⲉⲩⲙⲏϩ ⲛⲃⲁⲗ ⲙⲡⲉⲩⲕⲱⲧⲉ ⲧⲏⲣϥ ⲛϭⲓ ⲡⲉϥⲧⲟⲟⲩ ⲛⲍⲱⲟⲛ.
Ezek.1.19 ϩⲙ ⲡⲧⲣⲉⲩⲙⲟⲟϣⲉ ⲛϭⲓ ⲡⲉϥⲧⲟⲟⲩ ⲛⲍⲱⲟⲛ ϣⲁⲩⲙⲟⲟϣⲉ ϩⲱⲟⲩ ⲛϭⲓ ⲛⲉⲧⲣⲟⲭⲟⲥ ⲉⲩϣⲁⲛⲧⲱⲟⲩⲛ ⲛϭⲓ ⲛⲍⲱⲟⲛ ⲉⲃⲟⲗ ϩⲓϫⲙ ⲡⲕⲁϩ ϣⲁⲩⲧⲱⲟⲩⲛ ϩⲱⲟⲩ ⲛϭⲓ ⲛⲉⲧⲣⲟⲭⲟⲥ.
Ezek.1.20 ⲟⲩⲡⲛⲁ ⲛⲱⲛϩ ⲡⲉⲧⲛϩⲏⲧⲟⲩ.
Ezek.1.21 ⲁⲩⲱ ⲉⲩϣⲁⲛϫⲓⲥⲉ ⲉⲃⲟⲗ ϩⲓϫⲙ ⲡⲕⲁϩ ϣⲁⲩϫⲓⲥⲉ ϩⲱⲟⲩ ⲛⲙⲙⲁⲩ ϫⲉ ⲟⲩⲡ︤ⲛ︦ⲁ︥ ⲛⲱⲛϩ ⲡⲉⲧϩⲉⲛⲛⲉⲧⲣⲟⲭⲟⲥ.
Ezek.1.22 ⲁⲩⲱ ⲡⲉⲓⲛⲉ ⲉⲧϩⲓⲧⲡⲉ ⲛⲛⲍⲱⲟⲛ ⲉϥⲟ ⲛⲑⲉ ⲙⲡⲉⲥⲧⲉⲣⲉⲱⲙⲁ ⲛⲑⲉ ⲙⲡⲉⲓⲛⲉ ⲛⲟⲩⲕⲣⲩⲥⲧⲁⲗⲗⲟⲥ ⲉϥⲡⲱⲣϣ ⲉⲃⲟⲗ ϩⲓϫⲛ ⲛⲉⲩⲧⲛϩ ⲛⲧⲡⲉ.
Ezek.1.23 […]
Ezek.1.24 ⲁⲩϯⲟⲩⲱ ⲛⲛⲉⲩⲧⲛϩ ⲉⲩϩⲟⲟⲩ.
Ezek.1.25 ⲁⲩⲱ ⲉⲓⲥ ϩⲏⲏⲧⲉ ⲁⲥⲟⲩⲱⲛϩ ⲉⲃⲟⲗ ⲛϭⲓ ⲟⲩⲥⲙⲏ ⲙⲡⲉⲥⲧⲉⲣⲉⲱⲙⲁ ⲉⲧϩⲣⲁⲓ ϩⲓϫⲱⲟⲩ.
Ezek.1.26 ⲛⲑⲉ ⲙⲡⲉⲓⲛⲉ ⲛⲟⲩⲱⲛⲉ ⲛⲥⲁⲡⲡⲓⲣⲟⲛ ⲁⲩⲱ ⲟⲩⲉⲓⲛⲉ ⲛⲑⲣⲟⲛⲟⲥ ϩⲓϫⲱϥ ⲁⲩⲱ ⲛⲉϥϩⲓϫⲙⲡⲉⲓⲛⲉ ⲙⲡⲉⲑⲣⲟⲛⲟⲥ ⲟⲩⲉⲓⲛⲉ ⲛⲑⲉ ⲙⲡⲛⲁⲩ ⲛⲟⲩⲣⲱⲙⲉ ϩⲓⲧⲡⲉ.
Ezek.1.27 […]
Ezek.1.28 […]
Rev.4.1 ⲙ︤ⲛ︥ⲛ̄ⲥⲁ ⲛⲁⲓ̈ ⲁⲓ̈ⲛⲁⲩ ⲉⲩⲣⲟ ⲉϥⲟⲩⲏⲛ ϩⲣⲁⲓ̈ ϩ︤ⲛ︥ ⲧⲡⲉ ⲁⲩⲱ ⲧϣⲟⲣⲡ ⲛ̄ⲥⲙⲏ ⲛ̄ⲧⲁⲓ̈ⲥⲱⲧ︤ⲙ︥ ⲉⲣⲟⲥ ⲛ̄ⲑⲉ ⲛ̄ⲟⲩⲥⲁⲗⲡⲓⲅⲝ ⲉⲥϣⲁϫⲉ ⲛ︤ⲙ︥ⲙⲁⲓ̈ ⲉⲥϫⲱ ⲙ̄ⲙⲟⲥ ϫⲉ ⲁⲙⲟⲩ ⲉϩⲣⲁⲓ̈ ⲉⲡⲉⲓⲙⲁ ⲧⲁⲧⲥⲁⲃⲟⲕ ⲉⲛⲉⲧⲛⲁϣⲱⲡⲉ ⲙ︤ⲛ︥ⲛ̄ⲥⲁ ⲛⲁⲓ̈.
Rev.4.2 ⲛ̄ⲧⲉⲩⲛⲟⲩ ⲁⲓ̈ϣⲱⲡⲉ ϩ︤ⲙ︥ ⲡⲉⲡ︤ⲛ︦ⲁ︥ ⲁⲩⲱ ⲉⲓⲥ ϩⲏⲏⲧⲉ ⲛⲉⲟⲩⲛ̄ⲟⲩⲑⲣⲟⲛⲟⲥ ⲕⲏ ⲉϩⲣⲁⲓ̈ ϩ︤ⲛ︥ ⲧⲡⲉ ⲉⲣⲉⲟⲩⲁ ϩⲙⲟⲟⲥ ϩⲓ ⲡⲉⲑⲣⲟⲛⲟⲥ.
Rev.4.3 ⲁⲩⲱ ⲡⲉⲧϩⲙⲟⲟⲥ ϩⲓ ⲡⲉⲑⲣⲟⲛⲟⲥ ⲉϥⲉⲓⲛⲉ ⲛ̄ⲑⲟⲣⲁⲥⲓⲥ ⲛ̄ⲟⲩⲱⲛⲉ ⲛ̄ⲓ̈ⲁⲥⲡⲓⲥ ⲁⲩⲱ ⲛ̄ⲥⲁⲣⲇⲓⲛⲟⲥ ⲉⲣⲉⲟⲩⲟⲉⲓⲛ ⲕⲱⲧⲉ ⲉⲡⲉϥⲑⲣⲟⲛⲟⲥ ⲉϥⲟ ⲙ̄ⲡⲉⲓⲛⲉ ⲛ̄ⲟⲩⲥⲙⲁⲣⲁⲅⲇⲟⲥ.
Rev.4.4 ⲁⲩⲱ ⲉⲣⲉϫⲟⲩⲧⲁϥⲧⲉ ⲛ̄ⲑⲣⲟⲛⲟⲥ ⲙ̄ⲡⲕⲱⲧⲉ ⲙ̄ⲡⲉⲑⲣⲟⲛⲟⲥ ⲉⲣⲉϩⲉⲛⲡⲣⲉⲥⲃⲩⲧⲉⲣⲟⲥ ϩⲙⲟⲟⲥ ϩⲓ ⲡϫⲟⲩⲧⲁϥⲧⲉ ⲛ̄ⲑⲣⲟⲛⲟⲥ ⲉⲩϭⲟⲟⲗⲉ ⲛ̄ϩⲉⲛϩⲟⲉⲓⲧⲉ ⲛ̄ⲟⲩⲟⲃ︤ϣ︥ ⲉⲣⲉϩⲉⲛⲕⲗⲟⲙ ⲛ̄ⲛⲟⲩⲃ ϩⲓϫ︤ⲛ︥ ⲛⲉⲩⲁⲡⲏⲩⲉ.
Rev.4.5 ⲁⲩⲱ ⲛⲉⲩⲛⲏⲩ ⲉⲃⲟⲗ ϩ︤ⲙ︥ ⲡⲉⲑⲣⲟⲛⲟⲥ ⲛ̄ϭⲓ ϩⲉⲛⲉⲃⲣⲏϭⲉ ⲙ︤ⲛ︥ ϩⲉⲛⲥⲙⲏ ⲙ︤ⲛ︥ ϩⲉⲛϩⲣⲟⲩⲃⲃⲁⲓ ⲉⲣⲉⲥⲁϣ︤ϥ︥ ⲛ̄ⲗⲁⲙⲡⲁⲥ ⲛ̄ⲕⲱϩ︤ⲧ︥ ⲙⲟⲩϩ ⲙ̄ⲡⲉⲙⲧⲟ ⲉⲃⲟⲗ ⲙ̄ⲡⲉⲑⲣⲟⲛⲟⲥ ⲉⲧⲉⲛⲁⲓ̈ ⲛⲉ ⲡⲥⲁϣ︤ϥ︥ ⲙ̄ⲡ︤ⲛ︦ⲁ︥ ⲛ̄ⲧⲉ ⲡⲛⲟⲩⲧⲉ.
Rev.4.6 ⲁⲩⲱ ⲙ̄ⲡⲉⲙⲧⲟ ⲉⲃⲟⲗ ⲙ̄ⲡⲉⲑⲣⲟⲛⲟⲥ ⲛⲉⲟⲩⲛ̄ⲟⲩⲑⲁⲗⲁⲥⲥⲁ ⲛ̄ⲁⲃⲁϭⲏⲉⲓⲛ ⲉⲥⲉⲓⲛⲉ ⲛ̄ⲟⲩⲕⲣⲩⲥⲧⲁⲗⲗⲟⲥ ⲁⲩⲱ ⲛ̄ⲧⲙⲏⲧⲉ ⲙ̄ⲡⲉⲑⲣⲟⲛⲟⲥ ⲙ︤ⲛ︥ ⲡⲉϥⲕⲱⲧⲉ ⲛⲉⲩⲛ̄ϥⲧⲟⲟⲩ ⲛ̄ⲍⲱⲟⲛ ⲉⲩⲙⲉϩ ⲛ̄ⲃⲁⲗ ϩⲓⲑⲏ ⲁⲩⲱ ϩⲓⲡⲁϩⲟⲩ.
Rev.4.7 ⲡϣⲟⲣⲡ ⲛ̄ⲍⲱⲟⲛ ⲉϥⲉⲓⲛⲉ ⲛ̄ⲟⲩⲙⲟⲩⲓ̈ ⲡⲙⲉϩⲥⲛⲁⲩ ⲛ̄ⲍⲱⲟⲛ ⲉϥⲉⲓⲛⲉ ⲛ̄ⲟⲩⲙⲁⲥⲉ ⲡⲙⲉϩϣⲟⲙ︤ⲛ︦ⲧ︥ ⲛ̄ⲍⲱⲟⲛ ⲉϥⲟ ⲛ̄ϩⲟ ⲛ̄ⲣⲱⲙⲉ ⲡⲙⲉϩϥⲧⲟⲟⲩⲉ ⲛ̄ⲍⲱⲟⲛ ⲉϥⲉⲓⲛⲉ ⲛ̄ⲟⲩⲁⲉⲧⲟⲥ ⲉϥϩⲏⲗ.
Rev.4.8 ⲁⲩⲱ ⲡⲉϥⲧⲟⲟⲩ ⲛ̄ⲍⲱⲟⲛ ⲛⲉⲧⲉⲡⲟⲩⲁ ⲡⲟⲩⲁ ⲙ̄ⲙⲟⲟⲩ ⲥⲟⲟⲩ ⲛ̄ⲧ︤ⲛ︦ϩ︥ ϫⲓⲛ ⲛⲉⲩⲉⲓⲃ ⲙ̄ⲡⲉⲩⲕⲱⲧⲉ ⲉⲩⲙⲉϩ ⲛ̄ⲃⲁⲗ ⲙ̄ⲡⲉⲩϩⲟⲩⲛ ⲁⲩⲱ ⲙⲉⲩⲕⲁⲧⲟⲟⲧⲟⲩ ⲉⲃⲟⲗ ⲙ̄ⲡⲉϩⲟⲟⲩ ⲙ︤ⲛ︥ ⲧⲉⲩϣⲏ ⲉⲩϫⲱ ⲙ̄ⲙⲟⲥ ϫⲉ ϥⲟⲩⲁⲁⲃ ϥⲟⲩⲁⲁⲃ ϥⲟⲩⲁⲁⲃ ⲡϫⲟⲉⲓⲥ ⲡⲛⲟⲩⲧⲉ ⲡⲡⲁⲛⲧⲟⲕⲣⲁⲧⲱⲣ ⲡⲉⲧϣⲟⲟⲡ ⲁⲩⲱ ⲡⲉⲧⲉⲛⲉϥϣⲟⲟⲡ ⲁⲩⲱ ⲛⲉⲧⲛⲏⲩ.
Rev.4.9 ⲁⲩⲱ ⲉⲣϣⲁⲛⲛ̄ⲍⲱⲟⲛ ϯ ⲙ̄ⲡⲉⲟⲟⲩ ⲙ︤ⲛ︥ ⲡⲧⲁⲉⲓⲟ ⲙ︤ⲛ︥ ⲧⲉⲩⲭⲁⲣⲓⲥϯⲁ ⲙ̄ⲡⲉⲧϩⲙⲟⲟⲥ ϩⲓϫ︤ⲙ︥ ⲡⲉⲑⲣⲟⲛⲟⲥ ⲉⲧⲟⲛ︤ϩ︥ ϣⲁ ⲛⲓⲉⲛⲉϩ.
Rev.4.10 ϣⲁⲩⲡⲁϩⲧⲟⲩ ⲛ̄ϭⲓ ⲡϫⲟⲩⲧⲁϥⲧⲉ ⲙ̄ⲡⲣⲉⲥⲃⲩⲧⲉⲣⲟⲥ ⲙ̄ⲡⲉⲙⲧⲟ ⲉⲃⲟⲗ ⲙ̄ⲡⲉⲧϩⲙⲟⲟⲥ ϩⲓ ⲡⲉⲑⲣⲟⲛⲟⲥ ⲛ̄ⲥⲉⲟⲩⲱϣ︤ⲧ︥ ⲙ̄ⲡⲉⲧⲟⲛ︤ϩ︥ ϣⲁ ⲛⲓⲉⲛⲉϩ ⲛ̄ⲉⲛⲉϩ ⲁⲩⲱ ⲛ̄ⲥⲉⲛⲟⲩϫ ⲛ̄ⲛⲉⲩⲕⲗⲟⲙ ⲙ̄ⲡⲉⲙⲧⲟ ⲉⲃⲟⲗ ⲙ̄ⲡⲉⲧϩⲙⲟⲟⲥ ϩⲓ ⲡⲉⲑⲣⲟⲛⲟⲥ ⲉⲩϫⲱ ⲙ̄ⲙⲟⲥ.
Rev.4.11 ϫⲉ ⲕⲙ̄ⲡϣⲁ ⲡϫⲟⲉⲓⲥ ⲡⲉⲛⲛⲟⲩⲧⲉ ⲛ̄ϫⲓ ⲙ̄ⲡⲉⲟⲟⲩ ⲙ︤ⲛ︥ ⲡⲧⲁⲉⲓⲟ ⲙ︤ⲛ︥ ⲧϭⲟⲙ ϫⲉ ⲛ̄ⲧⲟⲕ ⲁⲕⲥ︤ⲛ︦ⲧ︥ⲛ̄ⲕⲁ ⲛⲓⲙ ⲁⲩⲱ ⲉⲩϣⲟⲟⲡ ⲁⲩⲱ ⲛ̄ⲧⲁⲩⲥⲱⲛ︤ⲧ︥ ⲉⲧⲃⲉ ⲡⲉⲕⲟⲩⲱϣ.