Num.16.20 ⲁⲩⲱ ⲁⲡϫⲟⲉⲓⲥ ϣⲁϫⲉ ⲛⲁϩⲣ︤ⲙ︥ ⲙⲱⲩ̈ⲥⲏⲥ ⲙ︤ⲛ︥ ⲁⲁⲣⲱⲛ ⲉϥϫⲱ ⲙ̄ⲙⲟⲥ ϫⲉ.
Num.16.21 ⲡⲉⲣ︤ϫ︥ⲧⲏⲩⲧ︤ⲛ︥ ⲉⲃⲟⲗ ϩ︤ⲛ︥ ⲧⲙⲏⲧⲉ ⲛ̄ⲧⲉⲓ̈ⲥⲩⲛⲁⲅⲱⲅⲏ ⲛ̄ⲧⲁⲟϫⲛⲟⲩ ⲛ̄ⲟⲩⲥⲟⲡ ⲛ̄ⲟⲩⲱⲧ.
Num.16.22 ⲁⲩⲱ ⲁⲩⲡⲁϩⲧⲟⲩ ⲉϩⲣⲁⲓ̈ ⲉϫ︤ⲙ︥ ⲡⲉⲩϩⲟ ⲡⲉϫⲁⲩ ϫⲉ ⲡⲛⲟⲩⲧⲉ ⲡⲛⲟⲩⲧⲉ ⲛ̄ⲛⲉⲡⲛⲉⲩⲙⲁ ⲙ︤ⲛ︥ ⲥⲁⲣ︤ⲝ︥ ⲛⲓⲙ ⲉϣϫⲉ ⲟⲩⲣⲱⲙⲉ ⲛ̄ⲟⲩⲱⲧ ⲁϥⲣ̄ⲛⲟⲃⲉ ⲉⲣⲉⲧⲟⲣⲅⲏ ⲙ̄ⲡϫⲟⲉⲓⲥ ⲛⲏⲩ ⲉϫ︤ⲛ︥ ⲧⲥⲩⲛⲁⲅⲱⲅⲏ ⲧⲏⲣ︤ⲥ︥.
Num.16.23 ⲁⲩⲱ ⲁⲡϫⲟⲉⲓⲥ ϣⲁϫⲉ ⲙ︤ⲛ︥ ⲙⲱⲩ̈ⲥⲏⲥ ⲉϥϫⲱ ⲙ̄ⲙⲟⲥ ϫⲉ.
Num.16.24 ϣⲁϫⲉ ⲙ︤ⲛ︥ ⲧⲥⲩⲛⲁⲅⲱⲅⲏ ⲉⲕϫⲱ ⲙ̄ⲙⲟⲥ ϫⲉ ⲥⲁϩⲉⲧⲏⲩⲧ︤ⲛ︥ ⲉⲃⲟⲗ ⲙ̄ⲡⲕⲱⲧⲉ ⲛ̄ⲧⲥⲩⲛⲁⲅⲱⲅⲏ ⲛ̄ⲕⲟⲣⲉ ⲙ︤ⲛ︥ ⲇⲁⲑⲁⲛ ⲙ︤ⲛ︥ ⲁⲃⲉⲓⲣⲱⲛ.
Num.16.25 ⲁⲩⲱ ⲁϥⲧⲱⲟⲩⲛ ⲛ̄ϭⲓ ⲙⲱⲩ̈ⲥⲏⲥ ⲁϥⲃⲱⲕ ϣⲁ ⲇⲁⲑⲁⲛ ⲙ︤ⲛ︥ ⲁⲃⲓⲣⲱⲛ ⲁⲩⲱ ⲁⲩⲃⲱⲕ ⲛ︤ⲙ︥ⲙⲁϥ ⲧⲏⲣⲟⲩ ⲛ̄ϭⲓ ⲛⲉⲡⲣⲉⲥⲃⲩⲧⲉⲣⲟⲥ ⲙ̄ⲡⲓⲥⲣⲁⲏⲗ.
Num.16.26 ⲁⲩⲱ ⲁϥϣⲁϫⲉ ⲛⲁϩⲣ︤ⲛ︥ ⲧⲥⲩⲛⲁⲅⲱⲅⲏ ⲉϥϫⲱ ⲙ̄ⲙⲟⲥ ϫⲉ ⲡⲉⲣ︤ϫ︥ⲧⲏⲩⲧ︤ⲛ︥ ⲉⲃⲟⲗ ⲛ̄ⲛⲉⲥⲕⲏⲛⲏ ⲛ̄ⲛⲉⲓ̈ⲣⲱⲙⲉ ⲉⲧⲛⲁϣ︤ⲧ︥ ⲁⲩⲱ ⲙ̄ⲡ︤ⲣ︥ϫⲱϩ ⲉⲗⲁⲁⲩ ϩ︤ⲛ︥ ⲛⲉⲧϣⲟⲟⲡ ⲛⲁⲩ ⲙ̄ⲡ︤ⲣ︥ⲧⲣⲉⲧⲉⲧ︤ⲛ︥ⲧⲁⲕⲟ ⲛ︤ⲙ︥ⲙⲁⲩ ϩⲣⲁⲓ̈ ϩ︤ⲛ︥ ⲛⲟⲃⲉ ⲛⲓⲙ ⲛ̄ⲧⲁⲩ.
Num.16.27 ⲁⲩⲱ ⲁⲩⲥⲁϩⲱⲟⲩ ⲉⲃⲟⲗ ⲙ̄ⲡⲕⲱⲧⲉ ⲛ̄ⲧⲉⲥⲕⲏⲛⲏ ⲛ̄ⲕⲟⲣⲉ ⲇⲁⲑⲁⲛ ⲇⲉ ⲙ︤ⲛ︥ ⲁⲃⲓⲣⲱⲛ ⲁⲩⲉⲓ ⲉⲃⲟⲗ ⲁⲩⲁϩⲉⲣⲁⲧⲟⲩ ϩⲁⲧ︤ⲛ︥ ⲛ̄ⲣⲟ ⲛ̄ⲧⲉⲥⲕⲏⲛⲏ ⲁⲩⲱ ⲛⲉⲩϩⲓⲟⲙⲉ ⲙ︤ⲛ︥ ⲛⲉⲩϣⲏⲣⲉ ⲙ︤ⲛ︥ ⲧⲉⲩⲁⲡⲟⲥⲕⲉⲩⲏ.
Num.16.28 ⲁⲩⲱ ⲡⲉϫⲁϥ ⲛ̄ϭⲓ ⲙⲱⲩ̈ⲥⲏⲥ ϫⲉ ϩ︤ⲙ︥ ⲡⲁⲓ̈ ⲧⲉⲧⲛⲁⲉⲓⲙⲉ ϫⲉ ⲡϫⲟⲉⲓⲥ ⲁϥⲧ︤ⲛ︥ⲛⲟⲟⲩ ⲙ̄ⲙⲟⲓ̈ ⲉⲉⲣⲛⲉⲓ̈ϩⲃⲏⲩⲉ ⲧⲏⲣⲟⲩ ϫⲉ ⲛ̄ϩⲁⲣⲟⲓ̈ ⲁⲛ ⲡⲉ.
Num.16.29 ⲉϣϫⲉ ⲕⲁⲧⲁ ⲡⲙⲟⲩ ⲛ̄ⲣⲱⲙⲉ ⲛⲓⲙ ⲥⲉⲛⲁⲙⲟⲩ ⲛ̄ϭⲓ ⲛⲁⲓ̈ ⲉϣϫⲉ ⲕⲁⲧⲁ ⲡϭ︤ⲙ︥ⲡϣⲓⲛⲉ ⲛ̄ⲣⲱⲙⲉ ⲛⲓⲙ ⲉⲩⲉϭ︤ⲙ︥ⲡⲉⲩϣⲓⲛⲉ ⲉⲡϫⲟⲉⲓⲥ ⲁⲛ ⲡⲉ ⲛ̄ⲧⲁϥⲧ︤ⲛ︥ⲛⲟⲟⲩⲧ.
Num.16.30 ⲁⲗⲗⲁ ⲡϫⲟⲉⲓⲥ ⲛⲁⲟⲩⲉⲛ︤ϩ︥ⲡⲁⲓ̈ ⲉⲃⲟⲗ ϩ︤ⲛ︥ ⲟⲩⲭⲁⲥⲙⲁ ⲁⲩϥ ⲛ̄ⲧⲉⲡⲕⲁϩ ⲟⲩⲱⲛ ⲉⲣⲱϥ ⲛ︤ϥ︥ⲱⲙ︤ⲕ︥ ⲙ̄ⲙⲟⲟⲩ ⲙ︤ⲛ︥ ⲛⲉⲩⲏⲓ̈ ⲙ︤ⲛ︥ ⲛⲉⲩⲥⲕⲏⲛⲏ ⲙ︤ⲛ︥ ⲛⲉⲧϣⲟⲟⲡ ⲛⲁⲩ ⲧⲏⲣⲟⲩ ⲛ̄ⲥⲉⲃⲱⲕ ⲉⲡⲉⲥⲏⲧ ⲉⲁⲙ︤ⲛ︥ⲧⲉ ⲉⲩⲟⲛ︤ϩ︥ ⲛ̄ⲧⲉⲧⲉⲛⲉⲓⲙⲉ ϫⲉ ⲛⲉⲓ̈ⲣⲱⲙⲉ ⲛⲉⲛⲧⲁⲩϯⲛⲟⲩϭ︤ⲥ︥ ⲉⲡϫⲟⲉⲓⲥ.
Num.16.31 ⲛ̄ⲧⲉⲣⲉϥⲟⲩⲱ ⲛ̄ⲛⲉⲓ̈ϣⲁϫⲉ ⲧⲏⲣⲟⲩ ⲁⲡⲕⲁϩ ⲡⲱϩ ϩⲁⲣⲟⲟⲩ.
Num.16.32 ⲁϥⲱⲙ︤ⲕ︥ ⲙ̄ⲙⲟⲟⲩ ⲙ︤ⲛ︥ ⲛⲉⲩⲏⲓ̈ ⲙ︤ⲛ︥ ⲛⲉⲩⲣⲱⲙⲉ ⲧⲏⲣⲟⲩ ⲉⲧϣⲟⲟⲡ ⲙ︤ⲛ︥ ⲕⲟⲣⲉ ⲙ︤ⲛ︥ ⲛⲉⲩⲧ︤ⲃ︥ⲛⲟⲟⲩⲉ.
Num.16.33 ⲁⲩⲃⲱⲕ ⲉⲡⲉⲥⲏⲧ ⲛ̄ⲧⲟⲟⲩ ⲙ︤ⲛ︥ ⲛⲉⲧϣⲟⲟⲡ ⲛⲁⲩ ⲙ︤ⲛ︥ ⲛⲉⲩⲧ︤ⲃ︥ⲛⲟⲟⲩⲉ ⲉⲁⲙ︤ⲛ︥ⲧⲉ ⲉⲩⲟⲛ︤ϩ︥ ⲁⲩⲱ ⲁⲡⲕⲁϩ ϩⲱⲃ︤ⲥ︥ ⲉⲃⲟⲗ ⲉϫⲱⲟⲩ ⲁⲩⲧⲁⲕⲟ ⲉⲃⲟⲗ ϩ︤ⲛ︥ ⲧⲙⲏⲧⲉ ⲛ̄ⲧⲥⲩⲛⲁⲅⲱⲅⲏ.
Num.16.34 ⲁⲩⲱ ⲡⲓⲥⲣⲁⲏⲗ ⲧⲏⲣ︤ϥ︥ ⲛⲉⲧ︤ⲙ︥ⲡⲉⲩⲕⲱⲧⲉ ⲁⲩⲡⲱⲧ ⲉⲃⲟⲗ ⲙ̄ⲡⲉⲩϩⲣⲟⲟⲩ ⲛ̄ⲧⲁϥϣⲱⲡⲉ ⲉⲩϫⲱ ⲙ̄ⲙⲟⲥ ϫⲉ ⲙⲏⲡⲟⲧⲉ ⲛ̄ⲧⲉⲡⲕⲁϩ ⲟⲙⲕⲟⲩ.
Num.16.35 ⲁⲩⲱ ⲁⲩⲕⲱϩ︤ⲧ︥ ⲉⲓ ⲉⲃⲟⲗ ϩⲓⲧ︤ⲙ︥ ⲡϫⲟⲉⲓⲥ ⲁⲩⲱ ⲁϥⲟⲩⲱⲙ ⲙ̄ⲡϣⲏⲧ ⲧⲁⲓ̈ⲟⲩ ⲛ̄ⲣⲱⲙⲉ ⲛⲉⲛⲧⲁⲩⲧⲁⲗⲉϣⲟⲩϩⲏⲛⲉ ⲉϩⲣⲁⲓ̈.