2Kgs.2.1 ⲁⲥϣⲱⲡⲉ ⲇⲉ ⲉⲣⲉⲡϫⲟⲉⲓⲥ ⲛⲁⲁⲛⲁⲗⲁⲙⲃⲁⲛⲉ ⲛϩⲏⲗⲓⲁⲥ ϩⲛ ⲟⲩⲕⲙⲧⲟ ⲉϩⲣⲁⲓ ⲉⲧⲡⲉ ϩⲏⲗⲓⲁⲥ ⲇⲉ ⲁϥⲙⲟⲟϣⲉ ⲙⲛ ⲉⲗⲓⲥⲁⲓⲟⲥ ⲉⲃⲟⲗ ϩⲛ ⲅⲁⲗⲅⲁⲗⲱⲛ.
2Kgs.2.2 ⲡⲉϫⲉϩⲏⲗⲓⲁⲥ ⲛⲉⲗⲓⲥⲥⲁⲓⲟⲥ ϫⲉ ϩⲙⲟⲟⲥ ⲛⲁⲕ ⲙⲡⲓⲙⲁ ⲉⲃⲟⲗ ϫⲉ ⲛⲧⲁⲡϫⲟⲉⲓⲥ ⲟⲩⲉϩⲥⲁϩⲛⲉ ⲛⲁⲓ ⲉⲧⲣⲁⲃⲱⲕ ϣⲁ ⲃⲁⲓⲑⲏⲗ ⲡⲉϫⲉⲉⲗⲓⲥⲁⲓⲟⲥ ⲛⲁϥ ϫⲉ ϥⲟⲛϩ ⲛϭⲓ ⲡϫⲟⲉⲓⲥ ⲁⲩⲱ ⲥⲟⲛϩ ⲛϭⲓ ⲧⲉⲕⲯⲩⲭⲏ ϫⲉ ⲉϣⲱⲡⲉ ϯⲛⲁⲃⲱⲕ ⲧⲁⲕⲁⲁⲕ ⲁⲩⲉⲓ ⲇⲉ ⲉϩⲣⲁⲓ ⲉⲃⲁⲓⲑⲏⲗ.
2Kgs.2.3 ⲁⲩⲱ ⲛϣⲏⲣⲉ ⲛⲛⲉⲡⲣⲟⲫⲏⲧⲏⲥ ⲉⲧϩⲛⲃⲁⲓⲑⲏⲗ ⲁⲩⲉⲓ ϣⲁ ⲉⲗⲓⲥⲁⲓⲟⲥ ⲉⲩϫⲱ ⲙⲙⲟⲥ ⲛⲁϥ ϫⲉ ⲉⲛⲉⲁⲕⲉⲓⲙⲉ ϫⲉ ⲡϫⲟⲉⲓⲥ ⲡⲛⲟⲩⲧⲉ ⲛⲁϥⲓ ⲙⲡⲉⲕϫⲟⲉⲓⲥ ⲙⲡⲟⲟⲩ ⲉϩⲣⲁⲓ ⲉⲧⲡⲉ ϩⲁ ⲡⲉⲕϩⲟ ⲡⲉϫⲉⲉⲗⲓⲥⲁⲓⲟⲥ ⲛⲁⲩ ϫⲉ ⲁⲓⲉⲓⲙⲉ ϩⲱ ⲕⲁⲣⲱⲧⲛ.
2Kgs.2.4 ϩⲏⲗⲓⲁⲥ ⲇⲉ ⲟⲛ ⲡⲉϫⲁϥ ⲛⲉⲗⲓⲥⲁⲓⲟⲥ ϫⲉ ϩⲙⲟⲟⲥ ⲛⲁⲕ ⲙⲡⲉⲓⲙⲁ ⲉⲃⲟⲗ ϫⲉ ⲁⲡϫⲟⲉⲓⲥ ⲟⲩⲉϩⲥⲁϩⲛⲉ ⲛⲁⲓ ⲉⲧⲣⲁⲃⲱⲕ ϣⲁ ϩⲓⲉⲣⲓⲭⲱ ⲡⲉϫⲉⲉⲗⲓⲥⲁⲓⲟⲥ ⲛⲁϥ ϫⲉ ϥⲟⲛϩ ⲛϭⲓ ⲡϫⲟⲉⲓⲥ ⲁⲩⲱ ⲧⲉⲕⲯⲩⲭⲏ ⲟⲛϩ ϫⲉ ⲉϣⲱⲡⲉ ϯⲛⲁⲃⲱⲕ ⲛⲧⲁⲕⲁⲁⲕ ⲁⲩⲉⲓ ⲇⲉ ⲉϩⲣⲁⲓ ⲉϩⲓⲉⲣⲓⲭⲱ.
2Kgs.2.5 ⲁⲩⲱ ⲛϣⲏⲣⲉ ⲛⲛⲉⲡⲣⲟⲫⲏⲧⲏⲥ ⲉⲧϩⲛϩⲓⲉⲣⲓⲭⲱ ⲁⲩⲱ ϯⲡⲉⲩⲟⲩⲟⲓ ⲉϩⲟⲩⲛ ⲉⲉⲗⲓⲥⲁⲓⲟⲥ ⲡⲉϫⲁⲩ ⲛⲁϥ ϫⲉ ⲁⲕⲉⲓⲙⲉ ϫⲉ ⲙⲡⲟⲟⲩ ⲡϫⲟⲉⲓⲥ ⲡⲛⲟⲩⲧⲉ ⲛⲁⲁⲛⲁⲗⲁⲙⲃⲁⲛⲉ ⲙⲡⲉⲕϫⲟⲉⲓⲥ ϩⲁ ⲡⲉⲕϩⲟ ⲡⲉϫⲉⲗⲓⲥⲁⲓⲟⲥ ⲛⲁⲩ ϫⲉ ⲁⲛⲟⲕ ϩⲱ ⲁⲓⲉⲓⲙⲉ ⲕⲁⲣⲱⲧⲛ.
2Kgs.2.6 ϩⲏⲗⲓⲁⲥ ⲇⲉ ⲟⲛ ⲡⲉϫⲁϥ ⲛⲁϥ ϫⲉ ϩⲙⲟⲟⲥ ⲛⲁⲕ ⲙⲡⲉⲓⲙⲁ ϫⲉ ⲛⲧⲁⲡϫⲟⲉⲓⲥ ϫⲟⲟⲥ ⲛⲁⲓ ⲉⲧⲣⲁⲃⲱⲕ ϣⲁ ⲡⲓⲟⲣⲇⲁⲛⲏⲥ ⲁⲩⲱ ⲉⲗⲓⲥⲁⲓⲟⲥ ⲡⲉϫⲁϥ ⲛⲁϥ ϫⲉ ϥⲟⲛϩ ⲛϭⲓ ⲡϫⲟⲉⲓⲥ ⲁⲩⲱ ⲧⲉⲕⲯⲩⲭⲏ ⲟⲛϩ ϫⲉ ⲉϣⲱⲡⲉ ϯⲛⲁⲃⲱⲕ ⲛⲧⲁⲕⲁⲁⲕ ⲁⲩⲙⲟⲟϣⲉ ⲇⲉ ϩⲓ ⲟⲩⲥⲟⲡ ⲙⲡⲉⲥⲛⲁⲩ.
2Kgs.2.7 ⲁⲩⲱ ⲧⲁⲓⲟⲩ ⲛⲣⲱⲙⲉ ⲉⲧⲉⲛϣⲏⲣⲉ ⲛⲉ ⲛⲛⲉⲡⲣⲟⲫⲏⲧⲏⲥ ⲁⲩⲙⲟⲟϣⲉ ⲛⲙⲙⲁⲩ ⲁⲩⲁϩⲉⲣⲁⲧⲟⲩ ⲙⲡⲟⲩⲉ ⲙⲡⲉⲩⲙⲧⲟ ⲉⲃⲟⲗ ⲛⲧⲟⲟⲩ ⲇⲉ ⲙⲡⲉⲥⲛⲁⲩ ⲁⲩⲁϩⲉⲣⲁⲧⲟⲩ ϩⲓϫⲙ ⲡⲓⲟⲣⲇⲁⲛⲏⲥ.
2Kgs.2.8 ⲁⲩⲱ ϩⲏⲧⲗⲓⲁⲥ ⲁϥϫⲓ ⲛⲧⲉϥⲙⲉⲗⲱⲧⲏ ⲁϥⲥⲉϩⲥⲱϩⲥ ⲁⲩⲱ ⲁϥⲣⲉϩⲧⲡⲙⲟⲟⲩ ⲛϩⲏⲧⲥ ⲁⲡⲙⲟⲟⲩ ⲡⲱⲣϫ ⲉⲡⲓⲥⲁⲙⲛ ⲡⲁⲓ ⲁⲩⲱ ⲁⲩϫⲓⲟⲣ ϩⲓ ⲟⲩⲥⲟⲡ ⲙⲡⲡⲉⲧϣⲟⲩϣⲟⲩ.
2Kgs.2.9 ⲛⲧⲉⲣⲟⲩϫⲓⲟⲟⲣ ⲇⲉ ⲡⲉϫⲉϩⲏⲗⲓⲁⲥ ⲛⲉⲗⲓⲥⲁⲓⲟⲥ ϫⲉ ⲁⲓⲧⲉⲓ ⲙⲙⲟⲓ ⲛⲟⲩϩⲱⲃ ⲛⲧⲁⲁϥ ⲛⲁⲕ ⲙⲡⲁⲧⲟⲩⲁⲛⲁⲗⲁⲙⲃⲁⲛⲉ ⲙⲙⲟⲓ ϣⲁ ⲡⲉⲕϩⲟ ⲡⲉϫⲉⲉⲗⲓⲥⲁⲓⲟⲥ ⲛⲁϥ ϫⲉ ⲙⲁⲣⲉⲡⲉⲕⲛⲁ ⲕⲱⲃ ⲉϩⲣⲁⲓ ⲉϫⲱⲓ.
2Kgs.2.10 ⲡⲉϫⲉϩⲏⲗⲓⲁⲥ ⲛⲁϥ ϫⲉ ⲁⲕⲣϩⲟⲩⲟ ⲉⲡϣⲓⲉⲁⲓⲧⲉⲓ ⲉⲕϣⲁⲛⲛⲁⲩ ⲉⲣⲟⲓ ⲉⲩⲁⲛⲁⲗⲁⲙⲃⲁⲛⲉ ⲙⲙⲟⲓ ϩⲁ ⲡⲉⲕϩⲟ ⲉⲣⲉⲡⲁⲓ ϣⲱⲡⲉ ⲛⲁⲕ ⲉⲩⲧⲙⲁⲛⲁⲗⲁⲙⲃⲁⲛⲉ ⲇⲉ ⲙⲙⲟⲓ ⲛⲛⲉⲡⲉⲓϩⲱⲃ ϣⲱⲡⲉ ⲛⲁⲕ .
2Kgs.2.11 ⲁⲩⲡⲟⲣϫⲟⲩ ⲉⲃⲟⲗ ⲛⲛⲉⲩⲉⲣⲏⲩ ⲛⲧⲉⲩⲛⲟⲩ ⲁⲩⲁⲛⲁⲗⲁⲙⲃⲁⲛⲉ ⲛϩⲏⲗⲓⲁⲥ ϩⲛⲟⲩⲕⲙⲧⲟ ⲉϩⲣⲁⲓ ⲉⲧⲡⲉ.
2Kgs.2.12 ⲉⲗⲓⲥⲁⲓⲟⲥ ⲇⲉ ⲛⲉϥⲛⲁⲩ ⲁⲩⲱ ⲁϥⲱϣ ⲉⲃⲟⲗ ⲉϥϫⲱ ⲙⲙⲟⲥ ϫⲉ ⲡⲁⲉⲓⲱⲧ ⲡⲉⲛⲓⲟⲭⲟⲥ ⲙⲡⲓ︤ⲏ︦ⲗ︥ ⲁⲩⲱ ⲡⲉϥϩⲓⲡⲡⲉⲩⲥ ⲁⲩⲱ ϭⲉ ⲁⲩⲗⲟ ⲉϥⲛⲁⲩ ⲉⲣⲟϥ ⲛⲧⲉⲩⲛⲟⲩ ⲁϥϯⲧⲟⲟⲧϥ ⲛⲛⲉϥϩⲟⲓⲧⲉ ⲁϥⲡⲁϩⲟⲩ ⲁϥⲁⲁⲩ ⲙⲡⲟϭⲉ ⲥⲛⲧⲉ.