_Joel.3.1 ϫⲉ ⲉⲓⲥ ϩⲏⲏⲧⲉ ⲁⲛⲟⲕ ϩ︤ⲛ︥ ⲛⲉϩⲟⲟⲩ ⲉⲧ︤ⲙ︥ⲙⲁⲩ ⲁⲩⲱ ϩ︤ⲙ︥ ⲡⲉⲟⲩⲟⲉⲓϣ ⲉⲧ︤ⲙ︥ⲙⲁⲩ ⲉⲓ̈ϣⲁⲛⲕⲧⲟ ⲛ̄ⲧⲁⲓ̈ⲭⲙⲁⲗⲱⲥⲓⲁ ⲛ̄ⲓ̈ⲟⲩⲇⲁ ⲙ︤ⲛ︥ ⲑⲓⲉⲣⲟⲩⲥⲁⲗⲏⲙ.
_Joel.3.2 ϯⲛⲁⲥⲱⲟⲩϩ ⲉϩⲟⲩⲛ ⲛ̄ⲛ̄ϩⲉⲑⲛⲟⲥ ⲧⲏⲣⲟⲩ ⲛ̄ⲧⲁⲛⲧⲟⲩ ⲉϩⲣⲁⲓ̈̈ ⲉⲡⲉⲓⲁ ⲛ̄ⲓ̈ⲱⲥⲁⲫⲁⲧ ⲛ̄ⲧⲁϫⲓϩⲁⲡ ⲛ︤ⲙ︥ⲙⲁⲩ ϩ︤ⲙ︥ ⲡⲙⲁ ⲉⲧ︤ⲙ︥ⲙⲁⲩ ⲉⲧⲃⲉ ⲡⲁⲗⲁⲟⲥ ⲙ︤ⲛ︥ ⲧⲁⲕⲗⲏⲣⲟⲛⲟⲙⲓⲁ ⲡⲓⲥⲣⲁⲏⲗ ⲛⲁⲓ̈ ⲉⲛⲧⲁⲩϫⲟⲟⲣⲟⲩ ⲉⲃⲟⲗ ϩ︤ⲛ︥ ⲛ̄ϩⲉⲑⲛⲟⲥ ⲁⲩⲱ ⲡⲁⲕⲁϩ ⲁⲩⲡⲟϣ︤ϥ︥ ⲉϩⲣⲁⲩ.
_Joel.3.3 ⲁⲩⲛⲉϫⲕⲗⲏⲣⲟⲥ ⲉϫ︤ⲙ︥ ⲡⲁⲗⲁⲟⲥ ⲁⲩⲱ ⲁⲩϯ ⲛ̄ⲛ̄ϣⲏⲣⲉ ϣⲏⲙ ⲉⲩⲡⲟⲣⲛⲉⲓⲁ ⲁⲩⲱ ⲛ̄ϣⲉⲉⲣⲉ ϣⲏⲙ ⲁⲩⲧⲁⲁⲩ ⲉⲃⲟⲗ ϩⲁ ⲟⲩⲏⲣ︤ⲡ︥ ⲁⲩⲥⲟⲟϥ.
_Joel.3.4 ⲟⲩ ⲡⲉ ⲡⲉⲧ︤ⲛ︥ϩⲱⲃ ⲛ̄ⲧⲱⲧ︤ⲛ︥ ⲛ︤ⲙ︥ⲙⲁⲓ̈ ⲧⲩⲣⲟⲥ ⲙ︤ⲛ︥ ⲥⲓⲇⲱⲛ ⲁⲩⲱ ⲧⲅⲁⲗⲓⲗⲁⲓⲁ ⲧⲏⲣ︤ⲥ︥ ⲛ̄ⲛ̄ⲁⲗⲗⲟⲫⲩⲗⲟⲥ ⲙⲏ ⲛ̄ⲧⲱⲧ︤ⲛ︥ ⲉⲧⲉⲧⲛⲁⲧⲱⲱⲃⲉ ⲛⲁⲓ̈ ⲛⲟⲩⲧⲱⲱⲃⲉ ⲏ ⲛ̄ⲧⲱⲧ︤ⲛ︥ ⲉⲧⲉⲧ︤ⲛ︥ⲛⲁⲙⲉⲉⲩⲉ ⲉⲩⲕⲁⲕⲓⲁ ⲉⲣⲟⲓ̈ ϩ︤ⲛ︥ ⲟⲩϭⲉⲡⲏ ⲉⲙ︤ⲛ︥ⲱⲥⲕ ϯⲛⲁϯ ⲙ̄ⲡⲉⲧ︤ⲛ︥ⲧⲱⲱⲃⲉ ⲉϫ︤ⲛ︥ ⲛⲉⲧ︤ⲛ︥ⲁⲡⲏⲩⲉ.
_Joel.3.5 ⲉⲃⲟⲗ ϫⲉ ⲡⲁϩⲁⲧ ⲙ︤ⲛ︥ ⲡⲁⲛⲟⲩⲃ ⲁⲧⲉⲧ︤ⲛ︥ϫⲓⲧⲟⲩ ⲁⲩⲱ ⲛⲁⲥⲱⲧ︤ⲡ︥ ⲉⲧⲙⲁⲉⲓⲏⲩ ⲁⲧⲉⲧ︤ⲛ︥ϫⲓⲧⲟⲩ ⲉϩⲟⲩⲛ ⲉⲛⲉⲧ︤ⲛ︥ⲣ̄ⲡⲏⲩⲉ.
_Joel.3.6 ⲁⲩⲱ ⲛ̄ϣⲏⲣⲉ ⲛ̄ⲓ̈ⲟⲩⲇⲁ ⲙ︤ⲛ︥ ⲛ̄ϣⲏⲣⲉ ⲛ̄ⲑⲓⲉⲣⲟⲩⲥⲁⲗⲏⲙ ⲁⲧⲉⲧ︤ⲛ︥ⲧⲁⲁⲩ ⲉⲃⲟⲗ ⲛ̄ⲛ̄ϣⲏⲣⲉ ⲛ̄ⲛ̄ⲟⲩⲉⲓⲉⲛⲓⲛ ϫⲉⲕⲁⲥ ⲉⲧⲉⲧⲛⲁⲛⲟϫⲟⲩ ⲉⲃⲟⲗ ϩ︤ⲛ︥ ⲛⲉⲩⲧⲟϣ.
_Joel.3.7 ⲉⲓⲥ ϩⲏⲏⲧⲉ ⲁⲛⲟⲕ ϯⲛⲁⲧⲟⲩⲛⲟⲥⲟⲩ ⲉⲃⲟⲗ ϩ︤ⲙ︥ ⲡⲙⲁ ⲉⲛⲧⲁⲧⲉⲧ︤ⲛ︥ⲧⲁⲁⲩ ⲉϩⲣⲁⲓ̈̈ ⲉⲣⲟϥ ⲁⲩⲱ ϯⲛⲁϯ ⲙ̄ⲡⲉⲧ︤ⲛ︥ⲧⲱⲱⲃⲉ ⲉϫ︤ⲛ︥ ⲛⲉⲧⲛⲁⲡⲏⲩⲉ.
_Joel.3.8 ⲁⲩⲱ ϯⲛⲁϯ ⲛ̄ⲛⲉⲧ︤ⲛ︥ϣⲏⲣⲉ ⲙ︤ⲛ︥ ⲛⲉⲧ︤ⲛ︥ϣⲉⲉⲣⲉ ⲉϩⲣⲁⲓ̈̈ ⲉⲧⲟⲟⲧⲟⲩ ⲛ̄ⲛ̄ϣⲏⲣⲉ ⲛⲓ̈ⲟⲩⲇⲁ ⲛ̄ⲥⲉⲧⲁⲁⲩ ⲉⲩⲁⲓⲭⲙⲁⲗⲱⲥⲓⲁ ⲉⲩϩⲉⲑⲛⲟⲥ ⲉϥⲟⲩⲏϩ ⲉⲃⲟⲗ ϫⲉ ⲁⲡϫⲟⲉⲓⲥ ϣⲁϫⲉ.
_Joel.3.9 ⲧⲁϣⲉⲟⲉⲓϣ ⲛ̄ⲛⲁⲓ̈ ϩ︤ⲛ︥ ⲛ̄ϩⲉⲑⲛⲟⲥ ⲧ︤ⲃ︥ⲃⲟ ⲛ̄ⲟⲩⲡⲟⲗⲉⲙⲟⲥ ⲧⲟⲩⲛⲟⲥ ⲛ̄ⲛ̄ⲣⲉϥⲙⲓϣⲉ ϯⲡⲉⲧⲛⲟⲩⲟⲉⲓ ⲉϩⲟⲩⲛ ⲛ̄ⲧⲉⲧ︤ⲛ︥ⲃⲱⲕ ⲉϩⲣⲁⲓ̈̈ ⲛ̄ⲣⲱⲙⲉ ⲧⲏⲣⲟⲩ ⲛ̄ⲣⲉϥⲙⲓϣⲉ.
_Joel.3.10 ⲟⲩⲱⲧ︤ϩ︥ ⲛ̄ⲛⲉⲧ︤ⲛ︥ⲥⲓⲛⲉ ⲛ̄ⲥⲕⲁⲓ ⲉϩⲉⲛⲥⲏϥⲉ ⲁⲩⲱ ⲛⲉⲧ︤ⲛ︥ⲟϩ︤ⲥ︥ ⲉϩⲉⲛⲙⲉⲣⲉϩ ⲡⲉⲧⲉⲙ︤ⲛ︥ϭⲟⲙ ⲙ̄ⲙⲟϥ ⲙⲁⲣⲉϥϫⲟⲟⲥ ϫⲉ ϯϭ︤ⲙ︥ϭⲟⲙ ⲁⲛⲟⲕ.
_Joel.3.11 ⲥⲉⲩϩⲧⲏⲩⲧ︤ⲛ︥ ⲉϩⲟⲩⲛ ⲛ̄ⲧⲉⲧ︤ⲛ︥ⲃⲱⲕ ⲉϩⲟⲩⲛ ⲛ̄ϩⲉⲑⲛⲟⲥ ⲧⲏⲣⲟⲩ ⲉⲧϩⲓⲛⲉⲩⲉⲣⲏⲩ ⲛ̄ⲧⲉⲧ︤ⲛ︥ⲥⲉⲩϩⲧⲏⲩⲧ︤ⲛ︥ ⲉⲡⲙⲁ ⲉⲧ︤ⲙ︥ⲙⲁⲩ ⲡⲣ︤ⲙ︥ⲣⲁϣ ⲙⲁⲣⲉϥϣⲱⲡⲉ ⲛ̄ⲣⲉϥⲙⲓϣⲉ.
_Joel.3.12 ⲙⲁⲣⲟⲩⲧⲱⲟⲩⲛ ⲛ̄ⲥⲉⲃⲱⲕ ⲉϩⲣⲁⲓ̈̈ ⲛ̄ϭⲓ ⲛ̄ϩⲉⲑⲛⲟⲥ ⲧⲏⲣⲟⲩ ⲉⲡⲉⲓⲁ ⲛ̄ⲓ̈ⲱⲥⲁⲫⲁⲧ ϫⲉ ⲉⲓ̈ⲛⲁϩⲙⲟⲟⲥ ϩ︤ⲙ︥ ⲡⲙⲁ ⲉⲧ︤ⲙ︥ⲙⲁⲩ ⲉϯϩⲁⲡ ⲉⲛϩⲉⲑⲛⲟⲥ ⲧⲏⲣⲟⲩ ⲉⲧϩⲓⲛⲉⲩⲉⲣⲏⲩ.
_Joel.3.13 ⲧ︤ⲛ︥ⲛⲟⲟⲩ ⲛ̄ⲛⲉⲧ︤ⲛ︥ⲟϩ︤ⲥ︥ ϫⲉ ⲁⲡϫⲱⲱⲗⲉ ϩⲱⲛ ⲉϩⲟⲩⲛ ⲃⲱⲕ ⲉϩⲟⲩⲛ ⲛ̄ⲧⲉⲧ︤ⲛ︥ϩⲱⲙ ϫⲉ ⲁⲧⲉϩⲣⲱⲧ ⲙⲟⲩϩ ⲁⲩⲱ ⲛⲉⲓⲟⲙ ⲁⲩⲣ̄ϩⲟⲩⲉ ⲡⲱⲱⲛ ⲉⲃⲟⲗ ϫⲉ ⲁⲥⲁϣⲁⲓ̈ ⲛ̄ϭⲓ ⲧⲉⲩⲕⲁⲕⲓⲁ.
_Joel.3.14 ϩⲉⲛⲣⲟⲟⲩ ⲁⲩⲱϣ ⲉⲃⲟⲗ ϩ︤ⲙ︥ ⲡⲉⲓⲁ ⲙ̄ⲡϩⲁⲡ ⲁⲩⲱ ϥ̄ϩⲏⲛ ⲉϩⲟⲩⲛ ⲛ̄ϭⲓ ⲡϩⲟⲟⲩ ⲙ̄ⲡϫⲟⲉⲓⲥ ϩ︤ⲙ︥ ⲡⲉⲓⲁ ⲙ̄ⲡϩⲁⲡ.
_Joel.3.15 ⲡⲣⲏ ⲙ︤ⲛ︥ ⲡⲟⲟϩ ⲥⲛⲁⲣ̄ⲉⲃⲏ ⲁⲩⲱ ⲛ̄ⲥⲓⲟⲩ ⲛ̄ⲥⲉⲛⲁϯ ⲁⲛ ⲙ̄ⲡⲉⲩⲟⲩⲟⲉⲓⲛ.
_Joel.3.16 ⲡϫⲟⲉⲓⲥ ⲇⲉ ϥⲛⲁⲱϣ ⲉⲃⲟⲗ ϩ︤ⲛ︥ ⲥⲓⲱⲛ ⲁⲩⲱ ϥⲛⲁϯ ⲙ̄ⲡⲉϥϩⲣⲟⲟⲩ ⲉⲃⲟⲗ ϩ︤ⲛ︥ ⲑⲓⲉⲣⲟⲩⲥⲁⲗⲏⲙ ⲧⲡⲉ ⲙ︤ⲛ︥ ⲡⲕⲁϩ ⲛⲁⲛⲟⲉⲓⲛ ⲡϫⲟⲉⲓⲥ ⲇⲉ ⲛⲁϯⲥⲟ ⲉⲡⲉϥⲗⲁⲟⲥ ⲁⲩⲱ ϥⲛⲁϯϭⲟⲙ ⲛ̄ⲛ̄ϣⲏⲣⲉ ⲙ̄ⲡⲓⲥⲣⲁⲏⲗ.
_Joel.3.17 ⲛ̄ⲧⲉⲧ︤ⲛ︥ⲉⲓⲙⲉ ϫⲉ ⲁⲛⲟⲕ ⲡⲉ ⲡϫⲟⲉⲓⲥ ⲡⲉⲧ︤ⲛ︥ⲛⲟⲩⲧⲉ ⲉⲓⲟⲩⲏϩ ϩ︤ⲛ︥ ⲥⲓⲱⲛ ⲡⲁⲧⲟⲟⲩ ⲉⲧⲟⲩⲁⲁⲃ ⲁⲩⲱ ⲑⲓⲉⲣⲟⲩⲥⲁⲗⲏⲙ ⲛⲁϣⲱⲡⲉ ⲛ̄ⲟⲩⲡⲟⲗⲓⲥ ⲉⲥⲟⲩⲁⲁⲃ ⲛ̄ⲧⲉⲧ︤ⲙ︥ϣ︤ⲙ︥ⲙⲟ ϭⲉ ⲙⲟⲟϣⲉ ⲉϩⲣⲁⲓ̈̈ ⲛ̄ϩⲏⲧ︤ⲥ︥.
_Joel.3.18 ⲁⲩⲱ ⲥⲛⲁϣⲱⲡⲉ ϩ︤ⲙ︥ ⲡⲉϩⲟⲟⲩ ⲉⲧ︤ⲙ︥ⲙⲁⲩ ⲛ̄ⲧⲟⲩⲉⲓⲏ ⲛⲁϣⲟⲩⲟ ⲉⲃⲟⲗ ⲛ̄ⲟⲩⲗⲟϭ ⲁⲩⲱ ⲛ̄ⲃⲟⲩⲛⲟⲥ ⲥⲉⲛⲁϣⲟⲩⲉⲉⲣⲱⲧⲉ ⲉⲃⲟⲗ ⲁⲩⲱ ⲙ̄ⲙⲁ ⲛ̄ϯⲙⲟⲟⲩ ⲧⲏⲣⲟⲩ ⲛ̄ⲓ̈ⲟⲩⲇⲁ ⲥⲉⲛⲁⲧⲁⲩⲉⲛⲉⲩⲙⲟⲟⲩ ⲉⲃⲟⲗ ⲁⲩⲱ ⲟⲩⲛⲟⲩⲡⲏⲅⲏ ⲛⲁⲉⲓ ⲉⲃⲟⲗ ϩ︤ⲙ︥ ⲡⲏⲓ̈ ⲙ̄ⲡϫⲟⲉⲓⲥ ⲛ̄ⲥⲧⲟ ⲙ̄ⲡⲉⲭⲉⲓⲙⲁⲣⲣⲟⲥ ⲛ̄ⲛ̄ϣⲟⲛⲧⲉ.
_Joel.3.19 ⲕⲏⲙⲉ ⲛⲁϣⲱⲡⲉ ⲉⲩⲧⲁⲕⲟ ⲁⲩⲱ ϯⲇⲟⲩⲙⲁⲓⲁ ⲉⲩⲙⲁ ⲛ̄ϫⲁⲓ̈ⲉ ⲛ̄ⲧⲁⲕⲟ ⲉⲃⲟⲗ ⲙ̄ⲡϫⲓⲛϭⲟⲛ︤ⲥ︥ ⲛ̄ⲛ̄ϣⲏⲣⲉ ⲛ̄ⲓ̈ⲟⲩⲇⲁ ⲉⲧⲃⲉ ϫⲉ ⲁⲩⲡⲉϩⲧⲟⲩⲥⲛⲟϥ ⲛ̄ⲇⲓⲕⲁⲓⲟⲛ ⲉⲃⲟⲗ ϩ︤ⲙ︥ ⲡⲉⲩⲕⲁϩ.
_Joel.3.20 ϯⲟⲩⲇⲁⲓⲁ ⲇⲉ ⲥⲛⲁϭⲱⲣ︤ϭ︥ ϣⲁ ⲉⲛⲉϩ ⲁⲩⲱ ⲑⲓⲉⲣⲟⲩⲥⲁⲗⲏⲙ ⲉϩⲉⲛϫⲱⲙ ⲛ̄ϫⲱⲙ.
_Joel.3.21 ⲁⲩⲱ ϯⲛⲁⲉⲓⲣⲉ ⲙ̄ⲡⲉⲕⲃⲁ ⲙ̄ⲡⲉⲩⲥⲛⲟϥ ⲛ̄ⲧⲁⲧ︤ⲙ︥ⲕⲱ ⲉⲃⲟⲗ ⲁⲩⲱ ⲡϫⲟⲉⲓⲥ ϥⲛⲁⲟⲩⲱϩ ϩ︤ⲛ︥ ⲥⲓⲱⲛ.