1Sam.1.1 ⲛⲉⲩⲉⲛⲟⲩⲣⲱⲙⲉ ⲇⲉ ⲉⲃⲟⲗ ϩⲛ ⲁⲣⲓⲙⲁⲑⲁⲉⲓⲙ ⲉⲃⲟⲗ ϩⲛ ⲥⲓⲫⲁ ⲡⲧⲟⲟⲩ ⲛⲉⲫⲣⲁⲓⲙ ⲉⲡⲉϥⲣⲁⲛ ⲡⲉ ⲉⲗⲅⲁⲛⲁ ⲡϣⲏⲣⲉ ⲛⲓⲉⲣⲉⲙⲓⲏⲗ ⲡϣⲏⲣⲉ ⲛϩⲏⲗⲓⲁⲥ ⲡϣⲏⲣⲉ ⲛⲑⲟⲕⲉ ϩⲛ ⲁⲥⲓⲃ ⲡⲧⲟⲟⲩ ⲛⲉⲫⲣⲁⲓⲙ.
1Sam.1.2 ⲁⲩⲱ ⲡⲁⲓ ⲛⲉⲟⲩⲛⲧⲁϥ ⲙⲙⲁⲩ ⲛⲥϩⲓⲙⲉ ⲥⲛⲧⲉ ⲡⲣⲁⲛ ⲛⲧⲟⲩⲉⲓ ⲙⲙⲟⲟⲩ ⲡⲉ ⲁⲛⲛⲁ ⲁⲩⲱ ⲡⲣⲁⲛ ⲛⲧⲙⲉϩⲥⲛⲧⲉ ⲡⲉ ⲫⲉⲛⲁⲛⲛⲁ ⲫⲉⲛⲁⲛⲛⲁ ⲇⲉ ⲛⲉⲟⲩⲛⲧⲥ ϣⲏⲣⲉ ⲙⲙⲁⲩ ⲁⲛⲛⲁ ⲇⲉ ⲛⲧⲟⲥ ⲛⲉⲙⲛⲧⲥ ϣⲏⲣⲉ ⲙⲙⲁⲩ.
1Sam.1.3 ⲡⲣⲱⲙⲉ ⲇⲉ ⲉⲗⲕⲁⲛⲁ ⲉⲛⲉϣⲁϥⲉⲓ ⲉϩⲣⲁⲓ ϩⲛ ⲧⲉϥⲡⲟⲗⲓⲥ ⲁⲣⲙⲁⲑⲁⲉⲓⲙ ⲕⲁⲧⲁ ϩⲟⲟⲩ ϩⲟⲟⲩ ⲉⲟⲩⲱϣⲧ ⲁⲩⲱ ⲉⲧⲁⲗⲉⲑⲩⲥⲓⲁ ⲉϩⲣⲁⲓ ⲙⲙⲁϩ ⲙⲡϫⲟⲉⲓⲥ ⲡⲛⲟⲩⲧⲉ ⲥⲁⲃⲃⲁⲱⲑ ϩⲛ ⲥⲏⲗⲱ ⲁⲩⲱ ϩⲏⲗⲓ ⲡⲟⲩⲏⲏⲃ ⲛⲉϥϩⲙⲡⲙⲁ ⲉⲧⲙⲙⲁⲩ ⲙⲛ ⲡⲉϥϣⲏⲣⲉ ⲥⲛⲁⲩ ⲟⲫⲛⲏ ⲙⲛ ⲫⲓⲛⲉⲉⲥ ⲉⲩⲟ ⲛⲟⲩⲏⲏⲃ ⲙⲡϫⲟⲉⲓⲥ.
1Sam.1.4 ⲡⲧⲱϣ ⲇⲉ ⲙⲡⲉϩⲟⲟⲩ ⲛⲧⲉⲣⲉϥϣⲱⲡⲉ ⲉⲗⲕⲁⲛⲁ ⲁϥϣⲱⲱⲧ ⲛⲧⲉϥⲑⲩⲥⲓⲁ ⲁϥϯ ⲛϩⲉⲛⲙⲉⲣⲓⲥ ⲙⲫⲉⲛⲁⲛⲛⲁ ⲧⲉϥⲥϩⲓⲙⲉ ⲙⲛ ⲛⲉϥϣⲏⲣⲉ ⲧⲏⲣⲟⲩ ⲙⲛ ⲛⲉϥϣⲉⲉⲣⲉ.
1Sam.1.5 ⲁⲛⲛⲁ ⲇⲉ ϩⲱⲱⲥ ⲁϥϯ ⲛⲁⲥ ⲛⲟⲩⲙⲉⲣⲓⲥ ⲛⲟⲩⲱⲧ ⲕⲁⲧⲁ ⲡⲉⲥϩⲟ ϫⲉ ⲛⲉⲙⲛⲧⲥϣⲏⲣⲉ ⲙⲙⲁⲩ ⲉⲗⲕⲁⲛⲁ ⲇⲉ ⲛⲉϥⲙⲉ ⲛⲁⲛⲛⲁ ⲉϩⲟⲩⲉ ⲉⲫⲉⲛⲁⲛⲛⲁ ⲁⲩⲱ ⲡϫⲟⲉⲓⲥ ⲁϥϣⲱⲧⲙ ⲉⲣⲉⲙⲡⲧⲱϣ ⲛⲧⲉⲥⲙⲏⲧⲣⲁ.
1Sam.1.6 ⲉⲃⲟⲗ ϫⲉ ⲛⲧⲟϥ ⲡϫⲟⲉⲓⲥ ⲙⲡⲉϥϯϣⲏⲣⲉ ⲛⲁⲥ ⲕⲁⲧⲁ ⲡⲧⲱϣ ⲛⲧⲉⲥⲑⲗⲓⲯⲓⲥ ⲁⲩⲱ ⲕⲁⲧⲁ ⲡⲉⲥⲟⲩⲱⲗⲥ ⲛϩⲏⲧ ⲉⲧⲛⲙⲙⲁⲥ ϩⲛ ⲧⲉⲥⲑⲗⲓⲯⲓⲥ ⲁⲩⲱ ⲛⲉⲥⲑⲗⲓⲃⲉ ⲉⲥⲟⲩⲟⲗⲥ ⲛϩⲏⲧ ⲉⲧⲃⲉ ⲡⲁⲓ ⲉⲃⲟⲗ ϫⲉ ⲁⲡϫⲟⲉⲓⲥ ϣⲱⲧⲙ ⲉⲣⲉⲙⲡⲕⲱⲧⲉ ⲛⲧⲉⲥⲙⲏⲧⲣⲁ ⲉⲧⲉⲙϯϣⲏⲣⲉ ⲛⲁⲥ.
1Sam.1.7 ⲧⲁⲓ ⲅⲁⲣ ⲧⲉ ⲑⲉ ⲉⲛⲉⲥⲉⲓⲣⲉ ⲙⲙⲟⲥ ⲧⲉⲣⲟⲙⲡⲉ ϩⲙ ⲡⲧⲣⲉⲥⲃⲱⲕ ⲉϩⲣⲁⲓ ⲉⲡⲏⲓ ⲙⲡϫⲟⲉⲓⲥ ⲁⲩⲱ ⲛⲉⲥⲙⲟⲕϩ ⲛϩⲏⲧ ⲉⲥⲣⲓⲙⲉ ⲉⲙⲉⲥϩⲙⲟⲟⲥ ⲉϩⲣⲁⲓ ⲉⲟⲩⲱⲙ.
1Sam.1.8 ⲉⲗⲕⲁⲛⲁ ⲇⲉ ⲡⲉⲥϩⲁⲓ ⲡⲉϫⲁϥ ⲛⲁⲥ ϫⲉ ⲁⲛⲛⲁ ⲛⲧⲟⲥ ⲇⲉ ⲡⲉϫⲁⲥ ⲛⲁϥ ⲉⲓⲥ ϩⲏⲏⲧⲉ ⲁⲛⲟⲕ ⲡϫⲟⲉⲓⲥ ϯⲥⲱⲧⲙ ⲉⲣⲟⲕ ⲡⲉϫⲁϥ ⲛⲁⲥ ϫⲉ ⲁϩⲣⲟ ϩⲓⲛⲁⲓ ⲧⲉⲣⲓⲙⲉ ⲁⲩⲱ ⲁϩⲣⲟ ⲛⲧⲉⲟⲩⲱⲙ ⲁⲛ ⲉⲣⲉⲡⲟⲩϩⲏⲧ ⲙⲟⲕϩ ⲙⲙⲟ ⲙⲏ ⲛⲁⲛⲟⲩⲓ ⲁⲛ ⲛⲉ ⲁⲛⲟⲕ ⲉϩⲟⲩⲉ ⲉⲙⲏⲧ ⲛϣⲏⲣⲉ.
1Sam.1.9 ⲁⲩⲱ ⲁⲥⲧⲱⲛⲥ ⲙⲛⲛⲥⲁ ⲛⲥⲟⲩⲱⲙ ϩⲛ ⲥⲏⲗⲱ ⲁⲥⲁϩⲉⲣⲁⲧⲥ ϩⲓⲑⲏ ⲙⲡϫⲟⲉⲓⲥ ϩⲏⲗⲓ ⲇⲉ ⲡⲟⲩⲏⲏⲃ ⲛⲉϥϩⲙⲟⲟⲥ ϩⲓϫⲛ ⲧⲉⲡⲛⲏ ⲛⲛⲉⲡⲩⲗⲏ ⲙⲡⲉⲣⲡⲉ ⲙⲡϫⲟⲉⲓⲥ.
1Sam.1.10 ⲁⲩⲱ ⲛⲧⲟⲥ ⲛⲉⲥⲟⲩⲟⲗⲥ ⲛϩⲏⲧ ⲉⲙⲁⲧⲉ ⲉⲁⲥϣⲗⲏⲗ ⲉϩⲣⲁⲓ ⲉⲡϫⲟⲉⲓⲥ ⲉⲥϫⲱ ⲙⲙⲟⲥ ⲉⲥⲣⲓⲙⲉ.
1Sam.1.11 ⲁⲩⲱ ⲉⲥⲉⲣⲏⲧ ⲛⲟⲩⲉⲣⲏⲧ ⲙⲡϫⲟⲉⲓⲥ ⲉⲥϫⲱ ⲙⲙⲟⲥ ϫⲉ ⲁⲇⲱⲛⲁⲓ ⲡϫⲟⲉⲓⲥ ⲉⲗⲱⲉⲓ ⲥⲁⲃⲃⲁⲱⲑ ϩⲛ ⲟⲩϭⲱϣⲧ ⲉⲕϣⲁⲛϭⲱϣⲧ ⲉϫⲙ ⲡⲉⲑⲃⲃⲓⲟ ⲛⲧⲉⲕϩⲙϩⲁⲗ ⲛⲅⲉⲣⲡⲁⲙⲉⲉⲩⲉ ⲛⲅϯ ⲛⲧⲉⲕϩⲙϩⲁⲗ ⲛⲟⲩⲥⲡⲉⲣⲙⲁ ⲛⲣⲱⲙⲉ ϯⲛⲁⲧⲁⲁϥ ⲛⲁⲕ ⲡⲉ ⲛⲧⲁⲓⲟ ⲙⲡⲉⲕⲙⲧⲟ ⲉⲃⲟⲗ ϣⲁ ⲡⲉϩⲟⲟⲩ ⲙⲡⲉϥⲙⲟⲩ ⲁⲩⲱ ⲟⲩⲏⲣⲡ ⲙⲛ ⲟⲩⲥⲓⲕⲉⲣⲁ ⲛⲛⲉϥⲥⲟⲟⲩ ⲁⲩⲱ ⲛⲛⲉⲧⲟⲕ ⲃⲱⲕ ⲉϫⲛ ⲧⲉϥⲁⲡⲉ.
1Sam.1.12 ⲁⲥϣⲱⲡⲉ ⲇⲉ ⲛⲧⲉⲣⲉⲥⲱⲥⲕ ⲉⲥϣⲗⲏⲗ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ϩⲏⲗⲓ ⲡⲟⲩⲏⲏⲃ ⲁϥϯⲧⲟⲟⲧϥ ⲉⲣⲉⲛⲣⲱⲥ.
1Sam.1.13 ⲛⲧⲟⲥ ⲇⲉ ⲛⲉⲥϣⲁϫⲉ ϩⲙ ⲡⲉⲥϩⲏⲧ ⲁⲩⲱ ⲛⲉⲣⲉⲛⲉⲥⲥⲡⲟⲧⲟⲩ ⲕⲓⲙ ⲉⲛⲥⲉⲥⲱⲧⲙ ⲁⲛ ⲉϩⲣⲟⲟⲩ ⲛⲧⲁⲥ ϩⲏⲗⲓ ⲇⲉ ⲁϥⲙⲉⲉⲩⲉ ⲉⲣⲟⲥ ϫⲉ ⲉⲥⲧⲁϩⲉ.
1Sam.1.14 ⲁⲩⲱ ⲡϣⲏⲣⲉ ⲛϩⲏⲗⲓ ⲡⲉϫⲁϥ ⲛⲁⲥ ϫⲉ ϣⲁⲛⲧⲉ ⲟⲩ ϣⲱⲡⲉ ⲉⲣⲛⲁϣⲱⲡⲉ ⲉⲣⲧⲁϩⲉ ⲛⲉϩⲡⲟⲩⲏⲣⲡ ⲉⲃⲟⲗ ⲙⲙⲟ ⲛⲧⲉⲗⲟ ⲙⲙⲁⲩ ϩⲁ ⲡϩⲟ ⲙⲡϫⲟⲉⲓⲥ.
1Sam.1.15 ⲁⲩⲱ ⲁⲁⲛⲛⲁ ⲟⲩⲱϣⲃ ⲡⲉϫⲁⲥ ϫⲉ ⲛϯⲧⲁϩⲉ ⲁⲛ ⲡϫⲟⲉⲓⲥ ⲁⲛⲟⲕ ⲧⲉ ⲧⲉⲥϩⲓⲙⲉ ⲉⲧⲟⲩⲟⲗⲥ ⲛϩⲏⲧ ⲛⲑⲉ ⲙⲡⲟⲟⲩ ⲛϩⲟⲟⲩ ⲁⲩⲱ ⲙⲡⲓⲥⲉⲏⲣⲡ ⲟⲩⲇⲉ ⲥⲓⲕⲉⲣⲁ ⲉⲓⲡⲱϩⲧ ⲛⲧⲁⲯⲩⲭⲏ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ.
1Sam.1.16 ⲙⲡⲉⲣⲕⲁⲧⲉⲕϩⲙϩⲁⲗ ⲛⲧⲟⲟⲧⲕ ⲛⲑⲉ ⲛⲟⲩϣⲉⲉⲣⲉ ⲉⲥⲛⲏϫ ⲉⲃⲟⲗ ϫⲉ ⲉⲃⲟⲗ ϩⲙ ⲡⲁϣⲁⲓ ⲛⲛⲁϣⲁϫⲉ ⲁⲓⲱⲥⲕ ϣⲁ ⲧⲉⲛⲟⲩ.
1Sam.1.17 ⲁⲩⲱ ϩⲏⲗⲓ ⲁϥⲟⲩⲱϣⲃ ⲉϥϫⲱ ⲙⲙⲟⲥ ⲛⲁⲥ ϫⲉ ⲃⲱⲕ ϩⲛ ⲟⲩⲉⲓⲣⲏⲛⲏ ⲡⲛⲟⲩⲧⲉ ⲙⲡⲓ︤ⲏ︦ⲗ︥ ⲉϥⲉϯ ⲛⲉ ⲙⲡⲟⲩⲁⲓⲧⲏⲙⲁ ⲧⲏⲣϥ ⲡⲉⲛⲧⲁⲣⲁⲓⲧⲉⲓ ⲙⲙⲟϥ ⲛⲧⲟⲟⲧϥ.
1Sam.1.18 ⲡⲉϫⲁⲥ ⲛⲁϥ ϫⲉ ⲁⲧⲉⲕϩⲙϩⲁⲗ ϭⲉⲛⲭⲁⲣⲓⲥ ⲙⲡⲉⲙⲧⲟ ⲉⲃⲟⲗ ⲛⲛⲉⲕⲃⲁⲗ ⲁⲩⲱ ⲧⲉⲥϩⲓⲙⲉ ⲁⲥⲃⲱⲕ ⲉϩⲣⲁⲓ ⲉⲧⲉⲥϩⲓⲏ ⲁⲥⲃⲱⲕ ⲉϩⲟⲩⲛ ⲉⲡⲉⲥⲙⲁ ⲛϭⲟⲉⲓⲗⲉ ⲁⲥϩⲙⲟⲟⲥ ⲁⲥⲟⲩⲱⲙ ⲙⲛ ⲡⲉⲥϩⲁⲓ ⲁⲩⲱ ⲁⲥⲥⲱ ⲁⲡⲉⲥϩⲟ ⲗⲟ ⲉϥⲟⲕⲙ.
1Sam.1.19 ⲁⲩⲧⲱⲟⲩⲛ ⲇⲉ ⲉϩⲧⲟⲟⲩⲉ ⲁⲩⲡⲁϩⲧⲟⲩ ⲁⲩⲟⲩⲱϣⲧ ⲙⲡϫⲟⲉⲓⲥ ⲁⲩⲙⲟⲟϣⲉ ⲉⲧⲉⲩϩⲓⲏ ⲁⲩⲱ ⲉⲗⲕⲁⲛⲁ ⲁϥⲉⲓ ⲉϩⲣⲁⲓ ⲉⲡⲉϥⲏⲓ ⲁⲣⲙⲁⲑⲁⲉⲓⲙ ⲁϥⲥⲟⲩⲉⲛⲁⲛⲛⲁ ⲧⲉϥⲥϩⲓⲙⲉ ⲁⲩⲱ ⲡϫⲟⲉⲓⲥ ⲁϥⲣⲡⲉⲥⲙⲉⲉⲩⲉ.
1Sam.1.20 ⲁⲥⲱ ⲁⲥϣⲱⲡⲉ ⲇⲉ ⲙⲡⲉⲩⲟⲉⲓϣ ⲛⲛⲉϩⲟⲟⲩ ⲁⲥϫⲡⲉⲟⲩϣⲏⲣⲉ ⲁⲥⲙⲟⲩⲧⲉ ⲉⲡⲉϥⲣⲁⲛ ϫⲉ ⲥⲁⲙⲟⲩⲏⲗ ⲉⲥϫⲱ ⲙⲙⲟⲥ ϫⲉ ⲛⲧⲁⲓⲁⲓⲧⲉⲓ ⲙⲙⲟϥ ⲛⲧⲟⲟⲧϥ ⲙⲡϫⲟⲉⲓⲥ ⲥⲁⲃⲁⲱⲑ.
1Sam.1.21 ⲁⲩⲱ ⲡⲣⲱⲙⲉ ⲉⲗⲅⲁⲛⲁ ⲁϥⲃⲱⲕ ⲉϩⲣⲁⲓ ⲙⲛ ⲡⲉϥⲏⲓ ⲧⲏⲣϥ ⲉⲥⲏⲗⲱ ⲉⲧⲣⲉϥϣⲱⲱⲧ ⲛⲧⲉⲑⲩⲥⲓⲁ ⲛⲛⲉϩⲟⲟⲩ ⲁⲩⲱ ⲉⲧⲣⲉϥϯ ⲛⲛⲉϥⲣⲉⲙⲏⲧ ⲙⲛ ⲛⲉⲣⲉⲙⲏⲧ ⲧⲏⲣⲟⲩ ⲙⲡⲉϥⲕⲁϩ.
1Sam.1.22 ⲁⲛⲛⲁ ⲇⲉ ⲙⲡⲉⲥⲃⲱⲕ ⲉϩⲣⲁⲓ ⲛⲙⲙⲁϥ ϫⲉ ⲁⲥϫⲟⲟⲥ ⲙⲡⲉⲥϩⲁⲓ ϫⲉ ϯⲛⲁϭⲱ ϣⲁⲛⲧⲉⲡϣⲏⲣⲉ ⲕⲟⲩⲓ ϫⲁⲧⲉ ⲛⲧⲁⲟⲙϫϥ ϫⲉ ⲉϥⲉⲟⲩⲱⲛϩ ⲉⲃⲟⲗ ϩⲓⲑⲏ ⲙⲡϫⲟⲉⲓⲥ ⲛϥϭⲱ ⲙⲡⲙⲁ ⲉⲧⲙⲙⲁⲩ ⲛϣⲁ ⲉⲛⲉϩ.
1Sam.1.23 ⲡⲉϫⲉⲉⲗⲅⲁⲛⲁ ⲡⲉⲥϩⲁⲓ ⲛⲁⲥ ϫⲉ ⲁⲣⲓⲡⲁⲅⲁⲑⲟⲛ ⲛⲁϩⲣⲛ ⲛⲟⲩⲃⲁⲗ ϩⲙⲟⲟⲥ ⲛⲉ ϣⲁⲛⲧⲉⲱⲙϫ ⲙⲡϣⲏⲣⲉ ⲕⲟⲩⲓ ⲁⲗⲗⲁ ⲡϫⲟⲉⲓⲥ ⲉϥⲉⲧⲁϩⲟ ⲉⲣⲁⲧϥ ⲙⲡⲉⲛⲧⲁϥⲉⲓ ⲉⲃⲟⲗ ϩⲛ ⲧⲟⲩⲧⲁⲡⲣⲟ ⲧⲉⲥϩⲓⲙⲉ ⲇⲉ ⲁⲥϩⲙⲟⲟⲥ ⲁⲥⲧⲥⲛⲕⲟ ⲙⲡⲉⲥϣⲏⲣⲉ ϣⲁⲛⲧⲉⲥⲱⲙϫ ⲙⲙⲟϥ.
1Sam.1.24 ⲁⲩⲱ ⲁⲥⲉⲓ ⲉϩⲣⲁⲓ ⲛⲙⲙⲁϥ ⲉⲥⲏⲗⲱ ⲙⲛ ⲟⲩⲙⲁⲥⲉ ⲉϥϩⲛϣⲟⲙⲧⲉ ⲛⲣⲟⲙⲡⲉ ⲁⲩⲱ ⲙⲛ ϩⲛⲟⲉⲓⲕ ⲙⲛ ⲟⲩϣⲓ ⲛⲥⲁⲙⲓⲧ ⲁⲩⲱ ⲟⲩϣⲓ ⲛⲏⲣⲡ ⲁⲥⲃⲱⲕ ⲉϩⲟⲩⲛ ⲉⲥⲏⲗⲱ ⲉⲡⲏⲓ ⲙⲡϫⲟⲉⲓⲥ ⲉⲣⲉⲡϣⲏⲣⲉ ⲕⲟⲩⲓ ⲛⲙⲙⲁⲩ.
1Sam.1.25 ⲁⲩⲧⲁϩⲟϥ ⲉⲣⲁⲧϥ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲁⲩⲱ ⲡⲉϥⲉⲓⲱⲧ ⲁϥϣⲱⲱⲧ ⲛⲧⲉⲑⲩⲥⲓⲁ ⲉϣⲁϥⲁⲁⲥ ⲙⲙⲁϩ ⲡϫⲟⲉⲓⲥ ⲕⲁⲧⲁ ⲡⲧⲱϣ ⲛⲛϩⲟⲟⲩ ⲁⲩⲱ ⲁϥⲉⲓⲛⲉ ⲙⲡϣⲏⲣⲉ ⲕⲟⲩⲓ ⲁϥϣⲱⲱⲧ ⲙⲡⲙⲁⲥⲉ ⲁⲛⲛⲁ ⲇⲉ ⲧⲙⲁⲁⲩ ⲙⲡϣⲏⲣⲉ ⲕⲟⲩⲓ ⲁⲥϯ ⲙⲡⲉⲥⲟⲩⲟⲓ ⲉϩⲏⲗⲓ.
1Sam.1.26 ⲡⲉϫⲁⲥ ⲛⲁϥ ϫⲉ ⲧⲉⲕⲯⲩⲭⲏ ⲟⲛϩ ϯϩⲧⲏⲕ ⲉⲣⲟⲓ ⲡϫⲟⲉⲓⲥ ⲁⲛⲟⲕ ⲧⲉ ⲧⲉⲓⲥϩⲓⲙⲉ ⲧⲉⲛⲧⲁⲥⲁϩⲉⲣⲁⲧⲥ ⲙⲡⲉⲕⲙⲧⲟ ⲉⲃⲟⲗ ϩⲙ ⲡⲁⲓ ⲉⲧⲣⲁϣⲗⲏⲗ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ.
1Sam.1.27 ⲉⲧⲃⲉ ⲡⲉⲓϣⲏⲣⲉ ⲕⲟⲩⲓ ⲁⲓϣⲗⲏⲗ ϭⲉ ⲉϩⲣⲁⲓ ⲉⲣⲟϥ ⲁⲩⲱ ⲛⲧⲟϥ ⲡϫⲟⲉⲓⲥ ⲁϥϯ ⲛⲁⲓ ⲙⲡⲁⲓⲧⲏⲙⲁ ⲛⲧⲁⲓⲁⲓⲧⲉⲓ ⲙⲙⲟϥ ⲛⲧⲟⲟⲧϥ.
1Sam.1.28 ⲁⲛⲟⲕ ϭⲉ ϩⲱ ϯⲛⲁⲧⲁⲁϥ ⲛⲧⲁⲓⲟ ⲙⲡϫⲟⲉⲓⲥ ⲛⲛⲉϩⲟⲟⲩ ⲧⲏⲣⲟⲩ ⲙⲡⲉϥⲱⲛϩ ⲉⲧⲣⲉϥϣⲱⲡⲉ ϩⲁⲣⲁⲧϥ ⲙⲡϫⲟⲉⲓⲥ.