Lam.1.1 ⲁⲥϣⲱⲡⲉ ⲙ︤ⲛ︥ⲛ̄ⲥⲁ ⲧⲣⲉⲩⲁⲓⲭⲙⲁⲗⲱⲧⲓⲍⲉ ⲙ̄ⲡⲓⲥⲣⲁⲏⲗ ⲁⲩⲱ ⲛ̄ⲧⲉⲑⲓⲉⲣⲟⲩⲥⲁⲗⲏⲙ ⲣ̄ϫⲁⲓ̈ⲉ ⲁϥϩⲙⲟⲟⲥ ⲉϩⲣⲁⲓ̈ ⲛ̄ϭⲓ ⲓ̈ⲉⲣⲉⲙⲓⲁⲥ ⲁϥⲣⲓⲙⲉ ⲁϥⲧⲟⲉⲓⲧ ⲙ̄ⲡⲉⲉⲓⲧⲟⲉⲓⲧ ⲉϫ︤ⲛ︥ ⲑⲓⲉⲣⲟⲩⲥⲁⲗⲏⲙ ⲉϥϫⲱ ⲙ̄ⲙⲟⲥ ϫⲉ ⲛ̄ⲁϣ ⲛ̄ϩⲉ ⲁⲥϩⲙⲟⲟⲥ ⲙⲁⲩⲁⲁⲥ ⲛ̄ϭⲓ ⲧⲡⲟⲗⲓⲥ ⲉⲧⲟϣ ⲙ̄ⲙⲏⲏϣⲉ ⲁⲥϣⲱⲡⲉ ⲛ̄ⲑⲉ ⲛ̄ⲟⲩⲭⲏⲣⲁ ⲧⲉⲧⲛⲁϣⲱⲥ ϩ︤ⲛ︥ ⲛ̄ϩⲉⲑⲛⲟⲥ ⲧⲉⲧⲟ ⲛ̄ⲁⲣⲭⲱⲛ ϩ︤ⲛ︥ ⲛⲉⲭⲱⲣⲁ ⲁⲥϣⲱⲡⲉ ⲉⲥϯϣⲱⲙ.
Lam.1.2 ϩ︤ⲛ︥ ⲟⲩⲣⲓⲙⲉ ⲁⲥⲣⲓⲙⲉ ⲛ̄ⲧⲉⲩϣⲏ ⲁⲩⲱ ⲛⲉⲥⲣ︤ⲙ︥ⲙⲓⲟⲟⲩⲉ ϣⲟⲩⲟ ⲉϫ︤ⲛ︥ ⲛⲉⲥⲟⲩⲟϭⲉ ⲉⲛ̄ϥϣⲟⲟⲡ ⲁⲛ ⲛ̄ϭⲓ ⲡⲉⲧⲛⲁⲥ︤ⲗ︥ⲥⲱⲗ︤ⲥ︥ ⲉⲃⲟⲗ ϩ︤ⲛ︥ ⲛⲉⲧⲙⲉ ⲙ̄ⲙⲟⲥ ⲧⲏⲣⲟⲩ ⲟⲩⲟⲛ ⲛⲓⲙ ⲉⲧⲙⲉ ⲙ̄ⲙⲟⲥ ⲁⲩⲁⲑⲉⲧⲉⲓ ⲙ̄ⲙⲟⲥ ⲁⲩϣⲱⲡⲉ ⲛⲁⲥ ⲉϩⲉⲛϫⲁϫⲉ.
Lam.1.3 ⲁⲩⲡⲉⲛⲉϯⲟⲩⲇⲁⲓⲁ ⲉⲧⲃⲉ ⲡⲁϣⲁⲓ ⲙ̄ⲡⲉⲥⲑ︤ⲃ︥ⲃⲓⲟ ⲁⲩⲱ ϩ︤ⲙ︥ ⲡⲁϣⲁⲓ ⲛ̄ⲧⲉⲥⲙ︤ⲛ︦ⲧ︥ϩ︤ⲙ︥ϩⲁⲗ ⲁⲥϩⲙⲟⲟⲥ ϩ︤ⲛ︥ ⲛ̄ϩⲉⲑⲛⲟⲥ ⲙ̄ⲡ︤ⲥ︥ϩⲉ ⲉⲙⲧⲟⲛ ⲟⲩⲟⲛ ⲛⲓⲙ ⲉⲧⲡⲏⲧ ⲛ̄ⲥⲱⲥ ⲁⲩⲧⲁϩⲟⲥ ⲛ̄ⲧⲙⲏⲧⲉ ⲛ̄ⲛⲉⲧⲑⲗⲓⲃⲉ ⲙ̄ⲙⲟⲥ.
Lam.1.4 ⲛⲉϩⲓⲟⲟⲩⲉ ⲛ̄ⲥⲓⲱⲛ ⲣ̄ϩⲏⲃⲉ ϫⲉ ⲙ︤ⲛ︥ⲡⲉⲧⲛⲏⲩ ⲉⲡϣⲁ ⲛⲉⲥⲡⲩⲗⲏ ⲧⲏⲣⲟⲩ ⲥⲉⲧⲁⲕⲏⲩ ⲛⲉⲥⲟⲩⲏⲏⲃ ⲥⲉⲁϣⲁϩⲟⲙ ⲛⲉⲥⲡⲁⲣⲑⲉⲛⲟⲥ ⲁⲩϥⲓⲧⲟⲩ ⲛ̄ⲁⲓⲭⲙⲁⲗⲱⲧⲟⲥ ⲁⲩⲱ ⲛ̄ⲧⲟⲥ ϩⲱⲱⲥ ⲛⲉⲥϭⲟⲛ︤ⲧ︥ ϩⲣⲁⲓ̈ ⲛ̄ϩⲏⲧ︤ⲥ︥.
Lam.1.5 ⲁⲩϣⲱⲡⲉ ⲛ̄ϭⲓ ⲛⲉⲧⲑⲗⲓⲃⲉ ⲙ̄ⲙⲟⲥ ⲉⲩⲟ ⲛ̄ⲁⲡⲉ ⲉⲣⲟⲥ ⲛⲉⲥϫⲁϫⲉ ⲁⲩⲣⲁϣⲉ ϫⲉ ⲁⲡϫⲟⲉⲓⲥ ⲑ︤ⲃ︥ⲃⲓⲟⲥ ⲉϫ︤ⲙ︥ ⲡⲁϣⲁⲓ ⲛ̄ⲛⲉⲥⲙ︤ⲛ︦ⲧ︥ϣⲁϥⲧⲉ ⲛⲉⲥϣⲏⲣⲉ ⲕⲟⲩⲓ̈ ⲁⲩⲃⲱⲕ ϩ︤ⲛ︥ ⲟⲩⲁⲓⲭⲙⲁⲗⲱⲥⲓⲁ ⲙ̄ⲡⲉⲙⲧⲟ ⲉⲃⲟⲗ ⲙ̄ⲡⲉⲧⲑⲗⲓⲃⲉ ⲙ̄ⲙⲟⲥ.
Lam.1.6 ⲁⲩϥⲓ ⲉⲃⲟⲗ ⲛ̄ⲧϣⲉⲉⲣⲉ ⲛ̄ⲥⲓⲱⲛ ⲙ̄ⲡⲉⲥⲥⲁ ⲧⲏⲣ︤ϥ︥ ⲁⲛⲉⲥⲁⲣⲭⲱⲛ ϣⲱⲡⲉ ⲉϩⲉⲛⲟⲉⲓⲗⲉ ⲉⲛⲥⲉϩⲏⲩ ⲁⲛ ⲉⲙⲁ ⲙⲙⲟⲟⲛⲉ ⲁⲩⲱ ⲛⲉⲩⲙⲟⲟϣⲉ ϩ︤ⲛ︥ ⲟⲩⲙ︤ⲛ︦ⲧ︥ⲁⲧϭⲟⲙ ⲙ̄ⲡⲉⲙⲧⲟ ⲉⲃⲟⲗ ⲙ̄ⲡⲉⲧϩⲣⲁ ⲛ̄ⲥⲱⲟⲩ.
Lam.1.7 ⲁⲥⲣ̄ⲡⲙⲉⲉⲩⲉ ⲛ̄ϭⲓ ⲑⲓⲉⲣⲟⲩⲥⲁⲗⲏⲙ ⲛ̄ⲛⲉϩⲟⲟⲩ ⲙ̄ⲡⲉⲥⲑ︤ⲃ︥ⲃⲓⲟ ⲙ︤ⲛ︥ ⲧⲉⲥⲙ︤ⲛ︦ⲧ︥ⲁⲧⲥⲱⲧ︤ⲙ︥ ⲁⲩⲱ ⲛⲉϩⲛⲁⲁⲩ ⲧⲏⲣⲟⲩ ⲉⲧⲥⲙⲉ ⲙ̄ⲙⲟⲟⲩ ⲉⲩϣⲟⲟⲡ ⲛⲁⲥ ϩ︤ⲛ︥ ⲛⲉϩⲟⲟⲩ ⲛ̄ϣⲟⲣⲡ ϩ︤ⲙ︥ ⲡⲧⲣⲉⲡⲉⲥⲗⲁⲟⲥ ϩⲉ ⲉϩⲣⲁⲓ̈ ⲉⲧⲟⲟⲧ︤ϥ︥ ⲙ̄ⲡⲉⲧⲑⲗⲓⲃⲉ ⲙ̄ⲙⲟⲥ ⲉⲛ̄ϥϣⲟⲟⲡ ⲁⲛ ⲛ̄ϭⲓ ⲡⲉⲧⲃⲟⲏⲑⲓ ⲉⲣⲟⲥ ⲛ̄ⲧⲉⲣⲟⲩⲛⲁⲩ ⲉⲣⲟⲥ ⲛ̄ⲧⲉⲉⲓϩⲉ ⲛ̄ϭⲓ ⲛⲉⲥϫⲁϫⲉ ⲁⲩⲥⲱⲃⲉ ⲉϫ︤ⲙ︥ ⲡⲡⲱⲱⲛⲉ ⲉⲃⲟⲗ ⲉⲛⲧⲁϥⲧⲁϩⲟⲥ.
Lam.1.8 ⲁⲥⲣ̄ⲛⲟⲃⲉ ϩ︤ⲛ︥ ⲟⲩⲛⲟⲃⲉ ⲛ̄ϭⲓ ⲑⲓⲉⲣⲟⲩⲥⲁⲗⲏⲙ ⲉⲧⲃⲉ ⲡⲁⲓ̈ ⲁⲥϣⲱⲡⲉ ⲉⲩⲛⲟⲉⲓⲛ ⲟⲩⲟⲛ ⲛⲓⲙ ⲉⲧϯⲉⲟⲟⲩ ⲛⲁⲥ ⲁⲩⲑ︤ⲃ︥ⲃⲓⲟⲥ ⲁⲩⲛⲁⲩ ⲅⲁⲣ ⲉⲧⲉⲥⲁⲥⲭⲏⲙⲟⲥⲩⲛⲏ ⲛ̄ⲧⲟⲥ ϩⲱⲱⲥ ⲛⲉⲥⲁϣⲁϩⲟⲙ ⲁⲥⲕⲟⲧ︤ⲥ︥ ⲉⲡⲁϩⲟⲩ.
Lam.1.9 ⲧⲉⲥⲁⲕⲁⲑⲁⲣⲥⲓⲁ ϩⲁ ⲛⲉⲥⲟⲩⲉⲣⲏⲧⲉ ⲙ̄ⲡ︤ⲥ︥ⲣ̄ⲡⲙⲉⲉⲩⲉ ⲛ̄ⲛⲉⲥϩⲁⲉⲉⲩ ⲁⲩⲱ ⲁⲥⲑ︤ⲃ︥ⲃⲓⲟ ⲙ̄ⲡⲉⲥⲛⲟϭ ⲛ̄ⲉⲟⲟⲩ ⲉⲛ̄ϥϣⲟⲟⲡ ⲁⲛ ⲛ̄ϭⲓ ⲡⲉⲧⲛⲁⲥ︤ⲗ︥ⲥⲱⲗ︤ⲥ︥ ⲉⲛⲁⲩ ϭⲉ ⲡϫⲟⲉⲓⲥ ⲉⲡⲁⲑ︤ⲃ︥ⲃⲓⲟ ϫⲉ ⲁⲡⲁϫⲁϫⲉ ϫⲓⲥⲉ ⲙⲙⲟϥ.
Lam.1.10 ⲁϥⲡ︤ⲣ︥ϣⲧⲟⲟⲧ︤ϥ︥ ⲉⲃⲟⲗ ⲉϫ︤ⲛ︥ ⲛⲉⲥϩⲛⲁⲁⲩ ⲧⲏⲣⲟⲩ ⲉⲧⲥⲟⲧ︤ⲡ︥ ⲛ̄ⲧⲟⲟⲧ︤ⲥ︥ ⲛ̄ϭⲓ ⲡⲉⲧⲑⲗⲓⲃⲉ ⲙ̄ⲙⲟⲥ ⲁⲥⲛⲁⲩ ⲅⲁⲣ ⲉⲛ̄ϩⲉⲑⲛⲟⲥ ⲉⲁⲩⲃⲱⲕ ⲉϩⲟⲩⲛ ⲉⲡⲉⲥⲙⲁ ⲉⲧⲟⲩⲁⲁⲃ ⲛⲁⲓ̈ ⲉⲛⲧⲁⲕⲟⲩⲉϩⲥⲁϩⲛⲉ ⲉⲧⲃⲏⲏⲧⲟⲩ ⲉⲧ︤ⲙ︥ⲧⲣⲉⲩⲃⲱⲕ ⲉϩⲟⲩⲛ ⲉⲧⲉⲕⲕⲗⲏⲥⲓⲁ.
Lam.1.11 ⲡⲉⲥⲗⲁⲟⲥ ⲧⲏⲣ︤ϥ︥ ⲥⲉⲁϣⲁϩⲟⲙ ⲉⲩⲕⲱⲧⲉ ⲛ̄ⲥⲁ ⲟⲉⲓⲕ ⲁⲩϯ ⲛⲛⲉⲥϩⲛⲁⲁⲩ ⲧⲏⲣⲟⲩ ⲉⲧⲥⲟⲧ︤ⲡ︥ ⲛ̄ⲧⲟⲟⲧⲥ ϩ︤ⲛ︥ ⲟⲩϩⲣⲉ ⲉⲧⲣⲉⲧⲉⲯⲩⲭⲏ ⲕⲧⲟⲥ ⲉⲣⲟⲟⲩ ⲁⲛⲁⲩ ϭⲉ ⲡϫⲟⲉⲓⲥ ⲁⲩⲱ ⲛ︤ⲅ︥ϯϩⲧⲏⲕ ϫⲉ ⲁⲥϣⲱⲡⲉ ⲉⲥⲥⲏϣ.
Lam.1.12 ⲛ̄ⲧⲱⲧ︤ⲛ︥ ⲧⲏⲣⲧ︤ⲛ︥ ⲛⲉⲧⲙⲟⲟϣⲉ ϩ︤ⲛ︥ ⲧⲉⲩϩⲓⲏ ⲉⲛⲉⲩⲙⲁ ⲕⲧⲉⲧⲏⲩⲧ︤ⲛ︥ ⲛ̄ⲧⲉⲧ︤ⲛ︥ⲛⲁⲩ ϫⲉ ⲉⲛⲉⲩⲟⲩⲛⲙ̄ⲕⲁϩ ϣⲟⲟⲡ ⲕⲁⲧⲁ ⲡⲁⲙⲕⲁϩ ⲉⲛⲧⲁϥϣⲱⲡⲉ ⲙ̄ⲙⲟⲓ̈ ⲁϥⲟⲩⲱⲛ ⲛ̄ⲣⲱϥ ⲉϩⲣⲁⲓ̈ ⲉϫⲱⲓ̈ ⲛ̄ϭⲓ ⲡϫⲟⲉⲓⲥ ⲁϥⲑ︤ⲃ︥ⲃⲓⲟⲓ̈ ϩ︤ⲙ︥ ⲡⲉϩⲟⲟⲩ ⲙ̄ⲡϭⲱⲛ︤ⲧ︥ ⲛ̄ⲧⲉϥⲟⲣⲅⲏ.
Lam.1.13 ⲁϥⲧ︤ⲛ︥ⲛⲟⲟⲩ ⲛ̄ⲟⲩⲕⲱϩ︤ⲧ︥ ⲉⲃⲟⲗ ϩ︤ⲙ︥ ⲡⲉϥϫⲓⲥⲉ ⲁϥⲛ̄ⲧ︤ϥ︥ ⲉϩⲣⲁⲓ̈ ⲉϫ︤ⲛ︥ ⲛⲁⲕⲉⲉⲥ ⲁϥⲡⲱⲣ︤ϣ︥ ⲛ̄ⲟⲩϣⲛⲉ ⲉⲛⲁⲟⲩⲉⲣⲏⲧⲉ ⲁϥⲕⲧⲟ ⲙ̄ⲙⲟⲓ̈ ⲉⲡⲁϩⲟⲩ ⲁϥⲧⲁⲁⲧ ⲉⲩⲧⲁⲕⲟ ⲉⲓ̈ⲙⲟⲕ︤ϩ︥ ⲛ̄ϩⲏⲧ ⲙ̄ⲡⲉϩⲟⲟⲩ ⲧⲏⲣ︤ϥ︥.
Lam.1.14 ⲁⲩⲧⲣⲁⲣⲟⲉⲓⲥ ⲉⲙ︤ⲛ︦ⲧ︥ϣⲁϥⲧⲉ ⲁⲩϭⲗⲟⲙⲗ︤ⲙ︥ ϩ︤ⲛ︥ ⲛⲁϭⲓϫ ⲁⲩⲁⲗⲉ ⲉϩⲣⲁⲓ̈ ⲉϫ︤ⲙ︥ ⲡⲁⲙⲁⲕϩ ⲁⲥⲣ̄ϭⲟⲃ ⲛ̄ϭⲓ ⲧⲁϭⲟⲙ ϫⲉ ⲁⲡϫⲟⲉⲓⲥ ϯ ⲛ̄ϩⲉⲛⲙ̄ⲕⲁϩ ⲛ̄ϩⲏⲧ ⲉϩⲣⲁⲓ̈ ⲉⲛⲁϭⲓϫ ⲛ̄ϯⲛⲁϣϭ︤ⲙ︥ϭⲟⲙ ⲁⲛ ⲉⲁϩⲉⲣⲁⲧ.
Lam.1.15 ⲁⲡϫⲟⲉⲓⲥ ϥⲓ ⲉⲃⲟⲗ ⲛ̄ⲛⲁϫⲱⲱⲣⲉ ⲧⲏⲣⲟⲩ ϩ︤ⲛ︥ ⲧⲁⲙⲏⲧⲉ ⲁϥⲙⲟⲩⲧⲉ ⲉⲩⲟⲉⲓϣ ⲉϩⲣⲁⲓ̈ ⲉϫⲱⲓ̈ ⲉⲧⲣⲉϥⲟⲩⲱϣ︤ϥ︥ ⲛ̄ⲛⲁⲥⲱⲧ︤ⲡ︥ ⲟⲩϩⲣⲱⲧ ⲁϥϩⲟⲙⲥ ⲛ̄ϭⲓ ⲡϫⲟⲉⲓⲥ ⲛ̄ⲧⲡⲁⲣⲑⲉⲛⲟⲥ ⲧϣⲉⲉⲣⲉ ⲛ̄ⲓ̈ⲟⲩⲇⲁ ⲉϫ︤ⲛ︥ ⲛⲁⲓ̈ ⲁⲛⲟⲕ ϯⲛⲁⲣⲓⲙⲉ.
Lam.1.16 ⲁⲡⲁⲃⲁⲗ ⲧⲁⲩⲟ ⲉϩⲣⲁⲓ̈ ⲛϩⲉⲛⲣ︤ⲙ︥ⲉⲓⲏ ϫⲉ ⲁⲡⲉⲧⲥⲟⲗⲥ︤ⲗ︥ ⲙ̄ⲙⲟⲓ̈ ⲟⲩⲉ ⲛ̄ⲥⲁⲃⲟⲗ ⲙ̄ⲙⲟⲓ̈ ⲡⲉⲧⲕⲧⲟ ⲛ̄ⲧⲁⲯⲩⲭⲏ ⲁⲛⲁϣⲏⲣⲉ ϣⲱⲡⲉ ⲉⲩⲧⲁⲕⲏⲩ ϫⲉ ⲁⲡⲁϫⲁϫⲉ ϭ︤ⲙ︥ϭⲟⲙ ⲉϩⲣⲁⲓ̈ ⲉϫⲱⲓ̈.
Lam.1.17 ⲁⲥⲓⲱⲛ ⲡⲱⲣ︤ϣ︥ ⲉⲃⲟⲗ ⲛ̄ⲛⲉⲥϭⲓϫ ⲙ̄ⲙ︤ⲛ︥ⲡⲉⲧⲥⲟⲗⲥⲗ ⲙ̄ⲙⲟⲥ ⲁⲡϫⲟⲉⲓⲥ ϩⲱⲛ ⲉⲧⲟⲟⲧ︤ϥ︥ ⲛ̄ⲓ̈ⲁⲕⲱⲃ ⲥⲉⲕⲱⲧⲉ ⲉⲣⲟϥ ⲛ̄ϭⲓ ⲛⲉⲧⲑⲗⲓⲃⲉ ⲙ̄ⲙⲟϥ ⲁⲑⲓⲉⲣⲟⲩⲥⲁⲗⲏⲙ ϣⲱⲡⲉ ⲛ̄ⲑⲉ ⲛ̄ⲟⲩⲥϩⲓⲙⲉ ⲉⲥⲛⲏϩ ⲉⲃⲟⲗ ϩ︤ⲛ︥ ⲧⲉⲩⲙⲏⲧⲉ.
Lam.1.18 ⲟⲩⲇⲓⲕⲁⲓⲟⲥ ⲡⲉ ⲡϫⲟⲉⲓⲥ ϫⲉ ⲁϥϯϭⲱⲛ︤ⲧ︥ ⲛ̄ⲧⲉϥⲧⲁⲡⲣⲟ ⲥⲱⲧ︤ⲙ︥ ϭⲉ ⲛ̄ⲗⲁⲟⲥ ⲧⲏⲣⲟⲩ ⲛ̄ⲧⲉⲧ︤ⲛ︥ⲛⲁⲩ ⲉⲡⲁⲙ̄ⲕⲁϩ ⲛⲁⲡⲁⲣⲑⲉⲛⲟⲥ ⲙ︤ⲛ︥ ⲛⲁϩⲣϣⲓⲣⲉ ⲁⲩⲃⲱⲕ ϩ︤ⲛ︥ ⲟⲩⲁⲓⲭⲙⲁⲗⲱⲥⲓⲁ.
Lam.1.19 ⲁⲓ̈ⲙⲟⲩⲧⲉ ⲉⲛⲁⲙⲉⲣⲁⲧⲉ ⲛ̄ⲧⲟⲟⲩ ⲇⲉ ⲁⲩⲣ̄ϩⲁⲗ ⲙ̄ⲙⲟⲓ̈ ⲛⲁⲟⲩⲏⲏⲃ ⲙ︤ⲛ︥ ⲛⲁⲡⲣⲉⲥⲃⲩⲧⲉⲣⲟⲥ ⲁⲩⲱϫ︤ⲛ︥ ϩ︤ⲛ︥ ⲧⲡⲟⲗⲓⲥ ϫⲉ ⲁϥⲕⲱⲧⲉ ⲛ̄ⲥⲁ ⲛⲉⲧⲟⲩⲛⲁⲟⲩⲟⲙⲟⲩ ⲉⲧⲣⲉⲛⲉⲩⲯⲩⲭⲏ ⲕⲧⲟⲟⲩ ⲉⲣⲟⲟⲩ ⲁⲩⲱ ⲙ̄ⲡⲟⲩϭ︤ⲛ︥ⲧⲟⲩ.
Lam.1.20 ⲁⲛⲁⲩ ⲡϫⲟⲉⲓⲥ ϫⲉ ϯⲑⲗⲓⲃⲉ ⲁϩⲏⲧ ϣⲧⲟⲣⲧ︤ⲣ︥ ⲁⲩⲱ ⲁⲡⲁϩⲏⲧ ⲕⲧⲟϥ ⲉϩⲣⲁⲓ̈ ⲛ̄ϩⲏⲧ ϫⲉ ϩ︤ⲛ︥ ⲟⲩϭⲱⲛ︤ⲧ︥ ⲁⲓ̈ϭⲱⲛ︤ⲧ︥ ⲁⲧⲥⲏϥⲉ ⲁⲁⲧ ⲛ̄ⲁⲧϣⲏⲣⲉ ϩⲓⲃⲟⲗ ⲛ̄ⲑⲉ ⲛ̄ⲟⲩⲙⲟⲩ ⲉϣⲁϥϣⲱⲡⲉ ϩ︤ⲛ︥ ⲟⲩⲏⲓ̈.
Lam.1.21 ⲥⲱⲧ︤ⲙ︥ ⲧⲉⲛⲟⲩ ϫⲉ ϯⲁϣⲁϩⲟⲙ ⲁⲛⲟⲕ ⲙ︤ⲛ︥ⲡⲉⲧⲥⲟⲗⲥ︤ⲗ︥ ⲙ̄ⲙⲟⲓ̈ ⲁⲛⲁϫⲓϫⲉⲟⲩ ⲧⲏⲣⲟⲩ ⲥⲱⲧ︤ⲙ︥ ⲉⲛⲁⲡⲉⲑⲟⲟⲩ ⲁⲩⲱ ⲁⲩⲣⲁϣⲉ ϫⲉ ⲛ̄ⲧⲟⲕ ⲡⲉⲛⲧⲁⲕⲁⲁⲩ ⲛⲁⲓ̈ ⲁⲕⲧ︤ⲛ︥ⲛⲟⲟⲩ ⲉϫⲱⲓ̈ ⲛ̄ⲟⲩϩⲟⲟⲩ ⲁⲩⲱ ⲁⲕⲙⲟⲩⲧⲉ ⲉⲩⲟⲉⲓϣ ⲁⲩϣⲱⲡⲉ ⲁⲩⲧ︤ⲛ︥ⲧⲱⲛ ⲉⲣⲟⲓ̈.
Lam.1.22 ⲙⲁⲣⲉⲧⲉⲩⲕⲁⲕⲓⲁ ⲧⲏⲣ︤ⲥ︥ ⲉⲓ ⲉϩⲟⲩⲛ ⲙ̄ⲡⲉⲕⲙ̄ⲧⲟ ⲉⲃⲟⲗ ⲁⲩⲱ ⲛ︤ⲅ︥ⲑ︤ⲙ︥ⲕⲟⲟⲩ ⲕⲁⲧⲁ ⲑⲉ ⲉⲛⲧⲁⲩⲙⲟⲕϩ︤ⲧ︥ ⲉⲧⲃⲉ ⲛⲁⲛⲟⲃⲉ ⲧⲏⲣⲟⲩ ϫⲉ ⲛⲁϣⲉⲛⲁⲁϣⲁϩⲟⲙ ⲁⲩⲱ ⲡⲁϩⲏⲧ ⲗⲩⲡⲓ.